皇家馬德里喺星期二嘅歐聯分組賽作客多蒙特，但呢支已經連奪兩屆歐聯冠軍嘅西甲勁旅，喺歐洲賽事作客德國球隊原來冇乜著數。根據往績，皇馬喺德國踢嘅31場比賽輸咗19場，而作客對多蒙特六次亦未贏過。

今年係皇馬同多蒙特連續第二年喺歐聯分組賽同組，過去六屆歐聯佢哋亦分別有五屆喺分組賽、8強或者4強碰頭，而多蒙特喺六次主場對皇馬嘅比賽就贏三場和三場，包括2012/13球季歐聯4強首回合大勝皇馬4:1，舊年分組賽佢哋就主客兩回合都係踢成2:2，多蒙特拎到小組首名出線權但最終贏到冠軍嘅都係皇馬。

皇馬今季喺西甲開季表現一般，暫時只係排喺聯賽榜第6位，落後榜首嘅巴塞隆拿7分，喺基斯坦奴朗拿度（C朗）有幾場停賽之下只係入到11球而失咗6球，多蒙特喺德甲就未輸過，五勝一和排喺聯賽榜首之餘，六場比賽總共入咗19球只係失咗1球。不過，雖然多蒙特喺德甲表現好好，但上場歐聯分組賽以1:3輸咗畀熱刺，想保持喺H組嘅出線機會今場必定要喺皇馬身上搶分。