一般資本主義國家，大企業會係最先受惠經濟增長嘅一批，其次先到人民。喺中國，利益分餅安排序係政治勢力、然後人民同企業，外資排最後。有時為求令政局穩定，會先餵飽人民，先至益企業，反映中國企業地位低於一般資本主義國家。即使中國經濟近年威脅美國領先地位，但按此排序下，加上排擠外資情況嚴重，令香港上市中資股估值遠遠低於其他資本主義市場。

習近平掌政之下，形勢未睇到有改變，股價唔駛講仍以靠攏政治勢力嘅企業為先；國策受惠股、或同人民未來福祉血脈相連嘅企業，例如有技術優勢嘅科技股，可以同人民嘅分餅次序並列，原因係，未來國運靠科技；最後利益先派到去其他企業，最差係一批有需要時就要為國捐軀嘅企業，例如內銀同券商股，咁解釋到點解內銀總是升浪龍尾股。

傳統中資股嘅投資價值係點，要先考量一下未來經濟增長有幾強，按傳統中資股分餅排序幾乎去到最後，反映經濟增長要好到政治勢力、人民、企業甚至外資都皆大歡喜之時，傳統中資股先會進入強勢，以後知點玩了。睇目前狀況，就算中國經濟未來如何反彈，貿易戰無論如何都令增長打折扣，相信傳統中資股會進入較長期劣勢。

講返近期市況，美滙弱、人仔強嘅轉向，以至港滙抽高，同嚿年12月尾至1月期間情況有相似之處。觀乎1月嘅大升市氣氛火熱，當時環球主要市場嘅傳統類、新經濟類齊齊升，港股交投日均1,200億以上，先做到個幾月急升5,000點嘅效果。上星期五成交活躍，去到1,300億，但保守估計有200億以上係來自富時換馬因素，要成交大幅度谷上固然不容易。今次唔排除係一個1月升市小型版，是否形成嘅關鍵係，後市成交有否增加去配合。

晉佳
http://www.facebook.com/advanceguy1

全球樓行 Dream House零距離
https://hk.feature.appledaily.com/overseasproperty