嗱，都話為善最樂、福有攸歸，東亞銀行主席、劍橋威水校友李國寶哥哥噚日出晒力幫母校籌款，而佢間銀行啲股價就好似坐火箭咁巴巴聲升。前日都係二十八個七，噚日上到三十一個三毫半。單一日升超過九個巴仙，八方印象中都冇乜幾何！

撲出撲入為母校出力

八方噚日同大家講劍橋慶祝成立八百周年，來港籌錢，佢哋希望籌十億英鎊，咁大個數當然要啲富貴校友鼎力支持。寶哥哥家族中咁多人受教於劍大，佢又咁熱心校友事務，所以一改三點不露、開會瞓覺嘅作風，晨咁早（個大party傍晚七點正式開始，佢六點半之前已經到場）就去到灣仔君悅，撲出撲入非常落力，一陣見佢出嚟迎接煲呔，一陣又見佢送賭王上車，李太同阿民斌亦嚟幫手，呢個校友真係唔話得。
咁主席熱心公益、熱愛母校，會唔會唔得閒理公司事務呢？八方可以咁講，各位東亞小股東一定唔使擔心，做好事有好報嘅。嗱，東亞上一年盤數都好靚，特別係中國內地啲生意，真係非常之有潛力。派完成績表之後股價一直向上，由二十四蚊升到噚日最高三十一個四，都不過係兩個月嘅事。有咁嘅回報，小股東話之個主席返唔返工吖。

一早睇好日圓賺到笑

其實寶哥哥自己嘅投資都好掂。八方記得○五年初有次同佢食飯，佢大力睇好日本。當時日本經濟仲係弱到無倫，完全冇人敢話幾時會轉勢。你話當時聽佢講買啲日股日圓，都可能唔使喺度寫稿。再講番東亞，寶哥哥自己揸嘅東亞唔算多（李家係東亞大股東，分三間公司合共揸住約一成九股權，大約二億八千萬股，值八十八億元），只有三千二百萬股佔2.12%，不過佢原來喺舊年十月就係咁買，個幾月買多咗六百萬股，當時股價不過二十二蚊，你話幾醒目呢。
所以，劍橋副校長AlisonRichard教授真係冇搵錯人幫手。噚日一日，東亞市值已經升咗四十億，冇錯係四十億；你話寶哥哥帶頭捐多少出嚟，莘莘學子就得益大大啦。

傳真︰2623-9278
電郵︰[email protected]