爭取衞冕嘅德國隊破唔到魔咒，不敵南韓緣盡今屆世界盃，唔少德國球迷哭波喪，但都唔會成為唔開工嘅理由啩？點知今日網上流傳一張易拉架相片，主角係民建聯觀塘社區幹事鄺星宇，重點係易拉架上寫住「德國出局，休站一天」八粒大字，有市民質疑係咪改圖，咁大膽蛇王唔開工？唔少網民就批評佢懶就懶，唔好賴落德軍輸波噃。

八方問過鄺星宇，佢話張圖係真嘅，唔係惡搞，解釋佢逢周四上午通常喺順天邨巴士站外開街站，但今日同區有另一場活動撞時間，為免街坊覺得佢突然唔見咗，咁啱自己對德國輸波又有啲感覺，所以搞下Gimmick將兩者串連，本來係諗住街坊都有啲共鳴，估唔到下面咁大反應。佢話其後都喺fb上載落區相，證明今朝有出現過。睇返帖文佢自稱經歷德國隊輸波出局，懷住沉重悲傷心情開街站，並hashtag「街站是必須的」，唔會有人覺得，此地無銀啩？