近期發生多宗學生自殺事件，中學生議會發言人黃泳其在港台節目《城市論壇》中反駁學生自殺並非因為不成熟，而是香港教育制度以成績掛帥，學生一旦無法升讀大學就會被社會標籤為「咩都做唔到」，學生因前路茫茫而失去生存動力，「向上流機會冇以前咁多，呢個是事實」。

黃泳其稱自己正正是喜歡藝術卻沒有選修藝術的例子，「喺現今嘅教育制度，揀創意科就係自尋死路，成績等於一切」。她指雖然校園生活算是愉快，但學業壓力亦相當大，因為本地學生能入讀大學的比率低，社會亦認定「入唔到大學就咩都做唔到，出嚟做嘢得萬幾蚊，迫住要諗將來」。她稱父母都期望子女「出盡全力」讀書，惟子女想自由和愉快學習，彼此期望有落差，「呢個咁變態嘅制度，一出世就要學前教育、TSA、升中等，依家要真真正正改變呢個被扭曲嘅社會」。

有中五學生發言時稱，不少家長仍視入讀大學是子女惟一出路，「呢個係咪社會價值觀問題？」亦大學生稱攻讀文憑和副學士期間仍不斷被催谷成績，反映香港社會仍認為不讀大學就等於沒有出路。