全球性跌市出現。由於人人預期周一美股會再跌,所以,港股在反映美股上周五嘅跌勢外,更再跌定先,結果恒指大跌逾400點,比一般人預期為多,但成交唔夠380億元,沽壓又唔算太大。期指尾市時受歐洲股市大跌衝擊,再插多100多點,低收16230,大跌545點,更大低水264點。
經噚日大跌後,港股中期已見頂(上周一的17328),但在衝破16000大關後的升浪仍會持續,現時的跌市可視為後抽整固,只要能守穩在16000以上,升市基礎並未被破壞,估計後市會在16000至17000反覆上落一段較長時間,待時機再成熟,始會再上衝高位,筆者仍有信心,恒指今年內可衝破17328,向17500至18000推進。
H指收7133,亦大跌244點,暫時仍守穩在20日線(7092)之上,由高位7500水平回落,仍可視為升後整固。論國企個勢,比藍籌為強,事實上,大行、基金同中資嘅錢,大部份都「堆」晒落中資股身上,大市調整完成後,佢哋肯定會大做國企。博反彈,首選係國企,次選才係二三線股。
哈爾濱動力(1133)噚日嘅表現都幾悅目,最高8.40元,收8.15元,仍有0.10元進賬,成交近800萬股,比上周五增倍,雖有沽壓,但食貨者更落力。上月20日推介哈動,當時股價6.30元,話睇8.10元,現時已超額完成。
睇番𠵱家個勢,喺大跌市中表現仲係咁強,升勢絕對係有餘未盡。由2月中到5月初,哈動走勢形成一個複式頭肩底,上周衝破頸線阻力,升上8.65元,家吓進行後抽整固,隨時會再起升浪,短線量度上升目標係9.70元。
哈動手頭上未完成定單有700億元,足夠未來3年發展,最重要一點,係早幾年接落嘅低毛利定單已完成,高毛利定單開始提供貢獻。
里昂最新研究報告看好哈動,指中國及印尼政府的大型設備供應合約可帶動哈動08年後的收益增長,而06及07兩年的產品付運亦會加快,估計年增長20%至30%,因此調高其06至08年的盈利預測,給予買入評級,目標價10.25元。
中油(135)低收4.175元,跌0.30元,現價已有值博率,若油價再升,可博反彈。
郭兆誠