【新增動新聞】
曼聯上星期六作客同史篤城賽和2:2，今季喺英超第一次失分。賽後，曼聯領隊摩連奴無視想同佢握手嘅史篤城領隊曉士，但就有同部分主隊教練團成員握手，而摩佬喺接受訪問嘅時候就拒絕回應唔肯握手呢個問題，仲話蠢人先會講蠢嘅嘢！

喺呢場比賽尾段，摩佬曾經踩去曉士嘅技術而被對方推開，有報道就話曉士同摩佬講「f--- off」，仲叫球證趕摩佬上觀眾席。摩佬喺比賽結束離開球場嗰陣就冇理想同佢握手嘅曉士，佢喺接受《BBC》訪問嘅時候話︰「我寧願唔答呢個問題，因為你個係好差嘅問題，因為睇落好似係我錯、我有問題。你個問題係唔啱嘅，我好抱歉。」

其後摩佬接受《BT Sport》訪問時更加話︰「我唔講蠢嘅嘢，我太老喇，蠢人先會講蠢嘢。」至於曉士就話︰「我推佢因為佢入咗我嘅技術區域，可能呢個係佢點解唔想同我握手嘅原因啦。」