今晚港姐總決賽儼如無綫app免費宣傳之夜，喺泳裝嘅問答環節，仲唔係由主持或嘉賓去發問，而係由睇住直播嘅網民嘅去問問題，但係係咪真係網民問呢，就有啲疑點喇。

首先係網民問嘅問題非常正經，絕對唔似係平時網民會問嘅問題，有睇開唔同平台直播嘅網民都會明，總會有啲網民會問啲好露骨、色情、羞辱性嘅問題，不過喺港姐決賽入面，就完全見唔到呢啲問題，只係見到啲好無聊嘅問題，好似「假如宣萱同嘟姐一齊跌落水救邊個先？」「被外星人捉咗點勸放走？」等等，不過呢啲可能係大台自己過濾咗啲問題，即係唔係完全實時。

第二個疑點，就係網民打嘅字全部都係正字，好似瞓覺個瞓字咁，網民多數都係打「訓」而唔會打個「瞓」字，仲有就係個「嚟」字，多數會打「泥」、「黎」，仲有個我哋個「哋」字，網民會打嘅會係「地」，真係好少網民會打個正字。不過唔排除會有網民打正字，而咁啱睇大台嘅網民，全部都打正字囉。

最後一個疑點就係網民嘅頭像，冇一張係真人相，仲要全部都係風景、動物、食物咁，同埋啲圖係會重複出現，甚至有一個網民名連問兩條問題，但個頭像就係兩個唔同嘅圖。

咁網民問咗啲咩，港姐之點答呢？
⁠⁠⁠⁠⁠
6號邱晴就話自己讀小學仲飲奶，而網民話支持，仲叫佢做多啲live。之後有人問佢宣萱同DO姐跌落水，會救邊個，邱晴話唔好意思，自己唔識游水，會報警。森美仲話唔想累一齊浸死，邱話跳埋落去一齊死，三個人去第二地方生活，最後DO姐就話救番邱晴轉頭。

而9號嘅金美黎，就有網民問佢鍾意飯定意，佢話：「因為我哋係中國人，所以鍾意食飯，中國人鍾食飯多啲。」森美就話意粉都係中國人發明，金美黎再話：「飯適合香港人多啲，家常便飯，多數係配飯。」之後仲被問到動物做港姐吉祥物，佢揀貓，一樣咁高貴大方識撒嬌。森美就話係高竇大使，金美黎就話：「唔係，因為我有養貓，佢哋只係用另一方式諗嘢。」

10號嘅張寶欣，網民就話鍾意佢笑容，仲問到鍾意自己邊部份？張寶欣就話：「自己笑容，笑得甜，想帶歡樂大家。」講到有好勁網名？佢就話：「我絕對唔做擦鞋仔，我性格真啲，用真性格同人相處，佢哋優點，真心讚。」森美喺側邊不斷幫佢補充，佢話：「係嘞，唔係擦，係講出佢哋嘅優點， 唔會擦鞋。」森美再話：「古惑喇，話自己唔係擦鞋仔，但係自己係咁擦人鞋。網絡世界冇人知係邊個，猛擦人鞋！」張寶欣尷尬笑，森美再問：「唔擦鞋地擦我鞋，點讚我？」張寶欣話：「森美司儀好風趣， 識搞氣氛，又幫我兜嘅.....。」森美再問嘅乜，張寶欣話嘅司儀。