【本報訊】停收廢紙昨踏入第二日，部份地區出現紙皮堆積、垃圾站爆滿情況。食環署職工權益工會主席區邦添指，未見署方增加人手，只是在區內再調配人手集中清理，加上廢紙要分類整理，令前線工作量大增，「我自己感覺部門真係冇乜招數，其實我覺得環保署真係畀咗好大隻鑊食環署」。
區指內地環保政策非一朝一夕推出，眾多官員平日與內地交流，不可能不知內地提升環保標準，但從未聽聞當局有部署，現時卻要求食環署清潔工人負責分類和整理廢紙，做法無賴。

「毫無先兆講食環會處理」

區邦添指，「失驚無神多咗咁多（廢紙），而（政府）係毫無先兆走出嚟講食環署會處理，我覺得呢樣嘢非常唔負責任」。他指每個垃圾站只多設一個660公升垃圾桶，根本不足以容納眾多紙皮箱。
環境局為應對停收廢紙，前日邀請4間綠在區區、18間社區回收中心協助回收廢紙，但回收數量極少。綠在沙田和綠在觀塘負責人周淑琼指，綠在區區角色與回收商不同，不會用錢購買紙皮，昨廢紙回收量與平時相若，「當你（回收）有價嘅時候，可能市民就會肯做多啲嘢囉，因為回收商停收，市民意欲就低好多囉」。
北區社區回收中心「健康行動」只收到少於10多公斤廢紙、南區社區回收中心121C回收社指，昨日只收到一、兩公斤廢紙，其後更被婆婆執走。
■記者潘柏林