今期（18日）夜馬跑全泥地，刨馬首先要估條跑道利放頭定後上，計錯跑道偏差條數都唔使旨意有運行。可惜，泥地跑道情況係點，實情係冇得估嘅，馬會自己都唔清唔楚，普羅馬迷大概只可以投石問路，早段場次忍忍手，睇定跑道情況係點先出手未遲。
馬會每次賽前都有公佈泥地跑道讀數，叫做畀馬迷參考。實情呢個模稜兩可嘅讀數，對馬迷冇乜大意義，根本近乎冇用，賽前落吓雨或者大風啲，都話影響到跑道狀況。已經講過，馬會將條泥地跑道外判咗畀承包商負責，承包商有位老外專家揸弗，跑道加唔加物料同幾時壓地，都係老外落柯打。至於老外專家係咪對條泥地跑道狀況瞭如指掌，得佢先知。佢有冇清楚向馬會管理層匯報，外界亦都唔知。
馬會唔知跑道狀況，咁幕後人或者落飛黨賽前，又知唔知道泥地跑道狀況呢？
情理上佢哋掌握嘅資料，一定多過普羅馬迷，否則又點夠膽大大注轟落一啲表面冇乜賽績根據嘅馬？馬迷唔知跑道情況，又想過吓癮，或者可以跟吓落飛黨小注怡情，博吓搭到順風車。
馬會一直都唔正視泥地跑道狀況飄忽呢個問題，馬迷都奈佢唔何，唯有自己避重就輕睇定先賭，頭兩場利放，之後就放心追放頭馬；頭兩場有追有放，就睇多兩場先賭。齋睇唔賭雖然有啲掃興，點都好過明蝕畀人，自己送上門做人哋嘅點心。

阿Joe