日本國民級組合SMAP稱得上係好多人嘅童年回憶，可惜因為尊尼事務所近年發生內部高層嘅人事鬥爭，今日當地多份報章、媒體都大事報道SMAP成派系鬥爭嘅犧牲品，除木村拓哉會繼續留低尊尼外，其他成員中居正廣、香取慎吾、草彅剛同埋稻垣吾郎都會跟一手捧紅SMAP嘅經理人飯島三智離巢，而同屬尊尼旗下嘅山下智久、Kis-My-Ft2、SexyZone等都係飯島派，唔知今次地震又會否受到波及。

飯島三智同尊尼事務所副社長Mary嘅關係越見白熱化，事關Mary親生女Julie捧紅嵐之後，令兩派爭做一哥情況激烈，Mary去年受訪更公開彈SMAP，加速SMAP今次解體。至於Julie旗下就有TOKIO、KAT-TUN、NEWS、關8同埋喜多川Johnny嘅KinKiKids及V6等。