河床對小保加嘅南美自由盃決賽次回合賽事一改再改，由上星期六改到星期日舉行，點知最後都係踢唔成，需要第二次改期，更加有消息指呢場世紀大戰最後可能要移師到海外舉行，真係亂過亂世佳人。

原定喺星期六舉行嘅次回合賽事因為小保加嘅隊巴受到河床球迷嘅襲擊，向隊巴掟石，而部份小保加球員就因為吸入警方發射嘅胡椒噴霧感到不適，其中中場柏保路佩雷斯喺事件中左眼受傷，最後南美足協宣佈將賽事延至星期日舉行。

不過到星期日開賽前兩個鐘，雖然已經開始有球迷入場，而小保加方面亦都公佈咗正選陣容，但係場外氣氛依然緊張，小保加最後就因為球員受襲擊事件影響暫時唔適宜作賽為由，向南美足協申請押後賽事。南美足協最後就被逼宣佈比賽再一次延期，並會宣佈喺當地時間星期二上晝公佈重賽日期。

據了解，今次小保加職球員遭到襲擊一事，係由河床一個右翼激進球迷會發起，而呢個球迷會嘅會長嘅屋企喺比賽前一日就遭到警方搜查，不過最後都係阻止唔到今次暴力事件發生。

另一方面，阿根廷政府同埋南美足協亦都被炮轟喺保安工作上監管不力，有傳媒就發現有部份河床球迷為咗避過球場安檢，將煙花綁喺隨行小朋友身上，妄顧兒童安全。曾經效力小保加嘅阿根廷名宿馬勒當拿仲批評喺阿根廷連睇波都冇保障：「阿根廷全國冇一個地方係安全，而呢個恐怖狀況已經蔓延到球場。」

而另一位小保加名宿列基美亦都認為今場原本嘅球壇盛事亦已經變質：「我已經厭倦呢幾日所見到嘅暴力事件，我唔敢相信竟然有人向小保加嘅隊巴掟石，而旁邊嘅人竟然冇出手阻止。呢場比賽已經唔再重要，重要嘅係球員嘅人身安全。」而小保加前鋒泰維斯亦都表明，小保加球員喺暴力陰影之下唔願意作賽。

呢場大戰到底幾時先踢得成就仲未知，不過據ESPN透露，南美足協就研究緊轉移比賽場地嘅可能性，由於南美自由盃嘅冠軍得主將會喺緊接嘅12月12日出戰喺阿聯酋舉行嘅世界冠軍球會盃，所以南美足協有可能將呢場決賽次回合賽事移師到阿布扎比舉行，令冠軍球隊可以直接留喺當地準備世冠盃。如果係咁嘅話，河床就會直接失去主場之利，到時河床就真係多得班球迷唔少咯！
--------------------
BFB CHAMPIONS 2.0 秋祭！儲值點數大增量，助你輕鬆招攬世界級球星！！ http://bit.ly/2xrTKGM
--------------------
《體蘋果》陪你睇波講波
https://www.fb.com/appledailysports