【獨家有片】林作媽媽拒裕美入門 若生B斷絕母子關係
裕美林作林作媽媽
林作與裕美戀情曝光後,花生殼散落一地,事關二人背景、學歷懸殊,裕美過往在情場上背負着黑歷史,而林作前度又是十優港姐,「林美戀」不受祝福幾乎是無可避免。連日來,林作在網上拼盡全力為女友護航,裕美則懶理旁人目光,盡情展露新任「作女郎」的勝利笑容。可是,沐浴在愛河中的他們,面前還有林作媽媽這一關未成功通過。今日林作和林母Lily在麥當勞道豪宅接受《蘋果》獨家訪問,憑林作媽媽的一個簡單手勢,可以肯定「林美戀」的情路,將會十分崎嶇難行。
【結婚冇商量餘地】
「林美戀」曝光至今近一星期,連日惹來花生友熱衷討論,最關心莫過於林作媽媽是否接受裕美做林家媳婦,林作媽媽在訪問中斬釘截鐵說:「暫時呢一刻冇商量餘地。」記者打趣問她二人若有小朋友讓她抱孫,會否較易接受,誰知Lily反應更大,她先矋一矋林作,再堅決落閘說:「咁佢過佢(嘅生活)㗎喇,我自己過我自己(嘅生活)啦,從此母子關係呢(用手做了「一刀切」動作)……」對媽媽激烈反應有點始料不及的林作,即說:「咁寸……咁我……都唔會生細路仔嘅,而家最緊要係事業行先。」Lily亦認同:「而家佢做保險先啱啱起步,做男人梗係事業為重,其實佢每次見完保險啲客都有同我分享,感情都有,我哋關係一直好好,唔好畀其他人搞污糟咗我哋母子嘅關係。」
【想搵個完美高質啲】
據林作透露,他和裕美拍拖近一年,其間有帶女友見家長,不過自己媽媽性格樂觀,對不接受的事物當看不見,雖然被阿仔揶揄,但這點Lily不單贊同,更說:「係呀,唔接受咪當睇唔到,當係幻覺囉,直至佢哋拖手我先醒。」對於林作指她歧視失婚女人,Lily亦很坦白:「一聽失過婚,雖然時間好短,但個心點都係唔舒服,我都想佢搵個完美啲、高質素啲,點知佢話哈利王子都係咁啦!攞呢啲同我傾,就冇得傾啦。呢幾日我壓力大到皮膚敏感又胃痛,知道阻佢都冇用,不過睇佢肯定唔會一個就止啦,等娶老婆就自然會謹慎㗎喇。我一向相信阿仔睇人好準,但而家未必準囉,哈哈,你(再望林作)明我意思啦!」
聽完媽媽的「弦外之音」,林作反擊說:「你都失過婚啦!」Lily以自身經驗警惕林作:「我失婚係因為你老竇出軌,所以你唔好學你老竇,亦唔好咁輕易結婚,好似我咁,當時就係衝動結婚、生仔同離婚,唔好行呢三步。」和媽媽由始至終對「失婚婦人」持不同睇法的林作說:「阿媽要我接受最上等教育,就係想個仔帶唔同嘅文化觀、價值觀返嚟,學費咁貴,究竟係讀屎片定係學到少少嘢返嚟?我覺得應該係後者,冇理由因為阿媽唔buy,就跪哋同老母講,『阿媽,對唔住,我係讀屎片』,作為一個男人,呢點要堅持,我唔係唔孝順,只係大家嘅睇法唔同,好多阿嬋都係睇唔開嘅!」
【送戒指唔代表求婚】
林作和裕美拍拖,Lily由抗拒到無奈接受,提到林作已經送戒指求婚,Lily未答,林作卻搶先說:「送戒指求婚?冇呢個意思喎,前任我都有送啦。」Lily此時亦勸阿仔:「所以話呢,以後唔好亂送戒指畀人喇,你自己唔介意,外面人唔係咁諗,送得戒指,基本上就覺得定落嚟。30歲仔拍吓拖冇所謂,但結婚就要諗清楚。自細我同佢講,要搵一個咩老婆,不過阿仔長大咗全部唔記得晒,其實唔一定要搵有錢女仔,只係唔想佢搵個咁多爭議嘅,新抱平凡啲,唔好畀到我咁大壓力。」此時林作插口說:「咁前度冇壓力?」Lily說:「之前都有啲壓力,因為之前嗰個名氣太大(雙手一高一低比劃)嗰個方面比較高,但一下就喺上面撻落嚟,你明㗎啦,反差大呀。」
【冇說話對裕美講】
裕美日前訪問時,在鏡頭前向伯母釋出善意,指若對方有不滿,她可以改善,Lily應記者要求,照辦煮碗對着鏡頭客氣地對裕美說:「暫時仲未有必要大家面對面講,心情仲未靜落嚟,我覺得現階段冇乜感覺,我自己都過唔到去,冇理由呢個時間去溝通去接受。」對於媽媽和女友的「鴻溝」,身旁的林作將責任歸咎於自己:「坦白講,成件事去到咁,係因為自己成就唔大,否則啲人絕對唔得閒理我老母嘅睇法,你睇吓特朗普揀老婆,使唔使睇佢老母面色?呢度我要講句對唔住囉!」
-----------------------------
打國際線 《蘋果》英文版免費試睇
按此了解更多 英文版已登錄新版《蘋果》App
按此下載/更新 林作和媽媽Lily感情一直要好,二人異口同聲表示當對方是朋友無所不談,但近日卻因感情事出現分歧。
林作和媽媽達成共識,大家都覺得事業為重,感情為輕。
Lily坦言暫時無法接受裕美,更無法接受二人生B。
Lily指直到林作和裕美拖手一刻,才如夢初醒。(資料圖片)
裕美日前接受《蘋果》訪問,坦言覺得林作在自己面前似奴隸,Lily對此說:「我覺得阿仔唔會咁做囉!」(資料圖片)
裕美指已收林作求婚戒指,但未應承結婚,林作今日卻指送戒指冇特別意思,否認求婚。(資料圖片)
提到裕美自認性冷感,林作指自己工作十分忙碌,沒有閒情做其他事,就算有亦可以靠自己。