現年23歲嘅韓國男星南柱赫，因模特兒身形及陽光外表於首次拍攝劇集《剩餘公主》時引起關注，及後憑劇集《學校2015》彈出，接連拍攝韓版《步步驚心》、《舉重妖精金福珠》等劇。近日忙於拍攝新劇《河伯的新娘 2017》嘅佢，早前爆出與同門女星李聖經嘅戀情，可謂愛情事業兩得意。

近日網上就瘋傳南柱赫小學及中學嘅畢業照，有唔少網民指南柱赫有依家嘅暖男形象全靠箍牙及髮型嘅改變，先有咁大分別。小學時期嘅南柱赫，單眼皮及形狀明顯嘅眉毛令人印象深刻；南柱赫於中學時期剪咗齊陰，畢業相中雖然南柱赫合埋口，但牙齒部分比小時候更為突出。而南柱赫似乎喺高中時期箍咗牙，矯正牙齒之外髮型亦有所改變，立即成個人感覺唔同晒。