醫學會前會長蔡堅雖然成六十七歲，但佢唔只身體好，仲老馬有火，之前先話想出山選會長，噚日佢仲更上一層樓，話自己唔只要選會長，仲考慮緊選埋下一屆立法會議員，挑戰界別代表怪醫梁家騮，話騮哥要專心去湊仔喎！
話說噚日醫學會午宴，蔡堅竟然柴台，一開始發言就話做醫學會冇乜意義，於是八方好奇問蔡堅，係咪諗諗吓都係對會長個位冇乜興趣？蔡醫生就笑笑口，話其實已經決定下年醫學會換屆時會出戰選會長，仲話考慮緊選埋下一屆立法會議員㖭！
蔡醫生仲同八方講，佢今次復出選醫學會會長，係因為想幫個會放吓啲瘀血，假如佢又成功選到立法會議員，就會專心退番個會長位置出嚟畀其他人做。八方問佢做乜對政治咁感興趣？蔡醫生笑笑口話，如果上屆立法會選舉佢有參選，「𠵱家鬧政府嘅次數一定會更多」。

同史泰祖握手似被姦

八方見蔡醫生講到咁白，言下之意係咪嫌立法會界別代表怪醫梁家騮做得唔好？蔡堅冇直接答，就用例子答八方：「可能騮哥想專心湊仔，先出席唔到（立法會）會議。」蔡堅又話中聯辦間中會約佢見面，佢曾直言「政改會一拍兩散」，又話政府勉強將香港人同內地融合要後果自負。
現任醫學會會長史泰祖之前以「為免業界分裂」為由，一度唔肯做政改民調，激起蔡堅把火，兩個人噚日見面都面左左，另一前會長謝鴻興到場後就捉住蔡堅同史泰祖要佢哋握手，場面尷尬。史泰祖話自己噚日條呔「藍黃都有」，象徵要和諧共融，但蔡堅形容「握後感」係「有啲被姦嘅感覺」。

李八方
mailto:[email protected]