紀念烏蛟騰村九位抗日烈士村民嘅「抗日英烈紀念碑」，噚日重建後揭幕。新碑高舊碑近一倍，並搬去較顯眼嘅新娘潭路旁。根正苗紅嘅民政事務局局長曾德成高調到場主持揭幕儀式，大談紀念碑如何體現中國人抵抗日軍、保家衞國精神。點知一被問到點睇港人想去釣魚台保家衞國時，曾德成即時轉身快閃。問到支唔支持民間保釣行動時，更拋下一句「我唔評論」。

老將：有冇咁邪呀？

唔知係咪一班英烈在天之靈都睇唔過眼，喺曾德成同一班嘉賓諗住走去「抗日英烈紀念碑」揭幕時，突然發現原先鋪喺碑上嘅紅布，早已神不知鬼不覺咁被揭開咗，此時更突然落起大雨。有出席活動嘅抗日老游擊隊成員面露驚訝，猛問人：「邊個掹低塊布o架？到底邊個掹o架？有冇咁邪呀？」最終曾德成揭幕不成，更淋到濕晒，連頒紀念品儀式都未完，就跳上架車走人。
至於噚日一早部署到場抽水，高舉「誓死保衞釣魚台」、「促請日本立即釋放船長，滾出釣魚台」標語嘅民建聯成員，亦無癮收場。先有愛國市民鬧佢哋稱「釣魚島」做「釣魚台」，搞到民建聯即場收起所有「釣魚台」字眼標語。

民建聯訴求隨時變

更騎呢嘅係，民建聯向傳媒派發致日本首相菅直人嘅公開信，用筆刪去「立即停止一切侵犯中國主權和領土的挑釁行為，取消在釣魚島附近水域舉行的一切軍事活動，包括計劃於年底舉行奪島軍事演習」呢一點。唔通民建聯諗住喺一點上妥協？民建聯代表事後認衰，指「同事用字錯誤」，應該叫釣魚台做釣魚島。至於突然刪改公開信內容，佢哋話想個訴求集中啲，又話刪咗唔代表唔堅持喎。
八方問過保釣委員會副主席區伯權，佢引述明朝典籍《順風相送》，稱釣魚台主島做「釣魚嶼」，其後釣魚嶼周邊小島納為「列島」，台灣官方稱之為「釣魚台列島」，中共就叫「釣魚列島」。中共官方新華社用「釣魚島」，台灣中央社就用「釣魚台」。香港保釣會提倡「保釣不分左中右」，幾個稱呼通用。

mailto:[email protected]