陳奐仁（Hanjin）最近練成「大隻仔」（新聞連結： https://bit.ly/2unTJqj ），今日佢同鄧穎芝一齊到康山出席一個遲啲會喺香港舉行嘅障礙賽記者會。Hanjin話自己到時都會落場跑，而且仲會代表聾人機構出賽。近來密密操肌嘅佢話，體重由82公斤減到現時70公斤，但仍要繼續落力去操。

Hanjin又話近來要開始戒口，尤其係佢最愛嘅肥豬肉：「要慢慢習慣，想試吓調節咗會唔會好啲，o依家要將肥豬肉變做食雞胸肉，所以平時會一齊煮。」

o依家減肥成功，最開心係咪太太？Hanjin話：「係好開心，主要係因為我冇咗鼻鼾，以前鼻鼾太勁會鬧我，話我嘈醒佢，或者佢冇反應我都會知佢唔開心。o依家唔會再因為我而被嘈醒，但兩日前我做歌通頂，佢鬧我唔陪佢瞓佢瞓唔着，但o依家我都會盡量早啲瞓。」

至於鄧穎芝近來就化身教練，訓練殘障學生蘇慈悅參賽，兩人今日都有現身，鄧穎芝話：「我個人參賽過兩次，今次陪學生跑應該會比往年付出更多力量，好多障礙Christine（蘇慈悅）都未必應付到，所以有時我都需要捧佢過去或幫佢。」

身為教練係咪壓力同責任大好多？佢話：「係大好多，但喺短時間內見到佢瘦咗一個碼我已經好開心，希望教多啲人一齊做運動，但唔會係正職，因為我仲有幕前工作。」

精選娛聞，喺晒《娛果》
http://fb.com/appledailyent