港股終於有個似樣反彈,全日升722點,重上萬八關,由於累積跌幅已大,相信升勢唔只得一日。喺熊市博反彈,要吼準強勢股,點為之強勢呢?喺近期跌浪能夠守得住上一次低位嘅,就係其中一個指標,濠賭股中嘅金沙(1928)就符合呢個要求。
金沙呢兩個交易日,即市下試8月低位19蚊水平後,均能迅速反彈,相比同業走勢明顯強橫。另一方面,澳門每逢月初都會公佈對上一個月嘅博彩收入,由於今年數據靚爆鏡,所以濠賭股月底例必炒一浸,噚日嘅反彈相信只係序幕,加上十.一黃金周將至,自由行客勢必逼爆澳門各大賭場,為濠賭股注入動力。金沙仲有一樣秘密武器,就係染藍概念,思捷(330)業績差劣,被踢出恒指只係時間問題,金沙作為濠賭股巨無霸,有望一登龍門,「升」價十倍。
金沙噚日收報21.45元,升9.4%,戰友可於現價上車,短炒目標價24元,跌穿19元止蝕。
唐牛