隔牆有耳：扮星爺話後悔冇食明將
千福BB：愛港一萬年 - 李八方
蘋果日報 2016/07/20 00:00
正式執包袱返美國嘅美國駐港總領事夏千福，噚日又拍片呃like，回顧佢3年在港擔任總領事四圍落區嘅日子。短片模仿周星馳主演《西遊記大結局之仙履奇緣》電影橋段，由執緊包袱嘅千福BB打開枱上突然出現嘅「月光寶盒」，播出佢以往去薄扶林村煮蘿蔔糕、去錦田打醮嘅後台參觀等片段。
下月返港搵真銀
不過，當千福BB被觀音問到有乜要講低時，佢望住相信係「劣食」明將壽司嘅壽司相片，模仿周星馳《西》嘅經典對白，以廣東話讀出呢句對白：「曾經有一份壽司擺喺我面前，但我冇珍惜，等到失去嘅時候先後悔莫及，塵世間最痛苦嘅事，莫過於此，如果上天可以畀我多啲時間，我或者會去食，我真係好愛香港，如果可以喺呢份愛加上一個期限，我希望係一萬年。」講多無謂，千福BB下個月返嚟香港加入私人公司搵真銀嗰陣，親身挑戰明將先算啦。短片最後千福BB離開領館，去到茶餐廳食西多士同飲凍奶茶作結。
只係一個小時，短片已經有超過6,000人睇過、呃like逾400。查實下任總領事基本上乜都唔使做，學吓千福BB咁周圍去食好西，就可以名垂千古。
只係一個小時，短片已經有超過6,000人睇過、呃like逾400。查實下任總領事基本上乜都唔使做，學吓千福BB咁周圍去食好西，就可以名垂千古。
喺片中執緊包袱嘅千福BB，打開「月光寶盒」回顧過去。