可能真係搵錢艱難，搞到連堂堂西甲班霸球會巴塞隆拿都要不停諗計仔吸引一班粉絲使錢。佢哋度出嚟嘅其中一條橋，就係容許球迷同一班球員，一齊搭同一架飛機去踢同睇作客嘅西甲比賽。

聽講話每一班「一隊飛機」只會預留80個位畀球迷，能夠同一班球星近距離接觸，當然係有代價嘅！每張機票盛惠145歐元（約1,277港元），不過呢個只係會員價，球迷會嘅成員要畀185歐元，乜都唔係嘅話，就要265歐元。買完機票仲要畀手續費，咁又25歐元，當然最最最重要嘅波飛又係另外計，呢度又要80歐元。所以話，想做真‧球迷，實在少個崩都唔掂呀！又或者「成功須父幹」啦！不過有樣嘢好，呢班機係即日來回巴塞嘅，開波果日飛，完場即閃，酒店都慳番，下一班飛機就係月尾作客基達菲場波啦！