網絡歌手張潔瑩成功轉場繼續唱 深信撐得住唔死就有成功機會
蘋果日報 2020/12/07 11:42
張潔瑩網上歌手
張潔瑩（Kit），現年29歲，是位獨立唱作歌手，她曾經為了唱歌放棄高薪厚職，站在街頭唱足八小時賺40元；又曾經為了「keep肥」，有唱片公司招手都不為所動，22歲由街頭唱到上舞台，曾參與大陸《中國達人秀》節目，因演唱Adele名曲《Rolling in the Deep》，被大陸傳媒封為「香港Adele」；走到2020年尾聲，一部手提電話加一支咪，就是Kit的大舞台，難得她依然享受音樂為她帶來的樂趣，「我成日都講，捱得住，最後仲企喺度，無死嗰個人，你嘅成功機會就會比別人多。」
從前當歌手最重要有大唱片公司做靠山，人脈比能歌善舞更加重要，但隨着時代轉變，越來越多歌手加入「直銷」市場，選擇自由身直接與樂迷接觸，自己sell自己。今年年初爆發武漢肺炎，嚴重打亂演藝圈多年來運作模式，令更加多歌手投向網絡世界的懷抱；新人老手，晚飯時間過後，排住隊開Live絕非奇景；然而，想在網絡世界分一杯羮，實力比知名度更重要！
初做網絡歌手最唔慣
現居長洲的Kit，生活反璞歸真，除了每天拖兩愛犬穿梭長洲大街小巷，或者在相熟的咖啡店打躉，其他時間大多都會留在家做網上直播。她笑謂：「以前年少氣盛，22、23歲覺得好有本錢去衝去試，而家心態上改變咗，唔係冇夢想，但點樣去做嘅方式唔一樣，開唔開心，自唔自在好緊要。」
不過，Kit承認剛開始在網上直播唱歌，完全不知道自己在做甚麼，「其實呢兩年主力都喺網上唱歌，初初都struggle（掙扎）咗好耐，因為隔住鏡頭見唔到觀眾，搞唔到氣氛，初初係零滿足感，會諗除咗為生存同滿足觀眾仲有乜？而家調整咗自己，知道喺網上唱係接觸好多人，當然亦多咗好多鍵盤戰士，會有人鬧你攻擊你。」Kit指她遇到這類人會跟對方傾偈，「以前會攻擊返對方，而家你話我樣衰，我會話呢個世界總有人你覺唔靚，係咪唔靚要攻擊要反枱，定係做一個善良嘅人，以生命影響生命？」
走過低潮戰勝抑鬱
無合約一身輕，Kit透露明年應該會有自己新歌，但未有簽公司計劃，她又笑說：「其實所有都係睇條件，自己永遠做嘢唔會先say no，但呢個時候都仲敢行埋嚟想簽我，都應該好大膽。」同時，Kit覺得時代已經改變，做不做「明星」已經不重要，要出名亦有好多方法，網上太多平台可以聽歌，香港是時候要轉變。她續說，有朋友試過簽了唱片公司，最後並未獲公司投放資源，結果因為合約未完，離開公司後也不能做音樂，所以她也慶幸當年自己沒有簽任何公司。
凡事隨遇而安，還未到30歲的Kit一副看透世界的模樣，但原來剛剛相反，她自爆樂觀性格只在鏡頭前，亦可能因為她很喜歡說話令有人這個感覺，但其實去年年底她抑鬱症復發，經歷好一陣子低潮期，感覺就像有怪獸在她身體跳出來，當時只想天天睡在床，如果不是要「放狗」根本動也不想動，但現在已經學懂了如何與這隻怪獸共存。
採訪：鄉奈仁
場地：啡寮
Kit自言沒有發明星夢，開心自在最緊要。
Kit已融入了長洲的生活，與街坊鄰里相處融洽。
Kit為愛犬搬入長洲，同時節省生活開支。
Kit指遇上網絡攻擊，現在已經不會嬲，反而想了解對方心態。
Kit現在主力在網上開Live接觸樂迷。（網上截圖）
疫情前本來都有其他演出工作。（facebook圖片）
Kit在街頭演唱已吸納了大批支持者。（facebook圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！