【新增短片】
香港整個6月份都被高溫籠罩，不過鄉議局主席劉業強今日就當住特首林鄭同一眾新界鄉紳面前大喊「六月飛霜」。事緣鄉議局今早舉辦慶回歸酒會，唔只中聯辦同解放軍派代表到場，娥特畀足面率領多名司局長到場主禮。不過劉業強致辭時，言語間似乎先讚暗踩現屆政府，有意想當眾落林鄭面喎！

劉業強喺酒會上致辭時，「例牌」先讚揚香港發展有成，全賴中央政府堅決落實「一國兩制港人治港」以及《基本法》，鄉議局會繼續支持中央維護《基本法》嘅權威。佢仲話國家主席習近平喺「十九大」時提出嘅「中國夢」，同時都係「全港700萬人嘅夢」，絕對相信祖國會一直喺背後全力支持香港發展，只要香港市民同心同德，「香港家本仍然豐厚」咁話喎！

不過作為「新界王」，劉就似乎借主場之利，乘機發難批評娥特。佢先讚揚現屆政府雖然要面對住房及交通兩大難題，但睇得出林鄭班子有決心尋求解決方法，仲話「任何一屆政府都唔係完美，只要大家良性溝通，天下係無解決唔到嘅問題。」但佢之後就馬上單刀直入，當住一眾嘉賓面前，批評政府坐擁逾千盈餘，但仍然無主動解決部分新界偏遠地區缺水缺電嘅問題，無好好善用盈餘咁話喎！

劉愈講愈興起，仲話鄉議局作為新界地區嘅「土地守護者」，近年有感原居民的合法權益「正敲起喪鐘」，形容佢地嘅處境猶如「六月飛霜」，未知會唔會同政府近年有意收緊「丁權」有關呢？

台上畀人訓話嘅林鄭雖然保持一貫笑容，但就無回應劉業強嘅「六月飛霜」論，唔知係無癮回應，抑或娥特只係趕住返去，同行會成員開「土地大辯論」呢？