7名警察於佔中期間襲擊曾健超案，全部罪成，要即時還柙，除咗逾3萬警員及家屬出席「集會」撐警（新聞連結： http://bit.ly/2lsfxw5 ），支持七警嘅，仲有一班香港影視娛樂同業。向太陳嵐今日代表一班同業，捐出7,777,777港元俾「敬言仁」基金，呢一大筆捐款，有唔少娛圈猛人出錢，包括周焯華、向華強、「六嬸」方逸華各捐出100萬；楊受成、林小明各捐50萬；之前表明撐警嘅曾志偉，就捐咗20萬。

呢777萬入面，HMV數碼中國聯席主席的蕭定一都有份，捐出20萬支持警察，佢今日回應《蘋果》時話：「向太（陳嵐）發起所有娛樂公司一齊籌款，籌錢畀佢哋（七警）屋企人，雖然七警有罪，但佢哋啲屋企人係無罪，我覺得佢哋屋企人好可憐，我就略表心意。」