公民黨立法會議員今日同傳媒舉行新春團拜，幾名議員應傳媒要求大合照其間，黨魁楊岳橋（AY）一度作勢要打黨友郭家麒醫生，究竟所為何事？

原來正當AY諗緊使唔使合照時講啲新年賀辭時，郭醫生突然高喊：「楊岳橋生仔咪得囉！」嚇到AY當堂眼都突，即場大嗌：「唔好亂噏啊！郭家麒！」但郭醫生並未放過佢，再話：「咁或者生囡囉！生孖胎都得！」

AY其後與傳媒食飯時，唔少傳媒都關心新婚嘅AY，有無好消息再公佈，同枱的郭醫生不忘製造懸疑，笑笑口話：「佢（AY）有無帶楊太出嚟畀你哋見？佢依家可能唔方便呢？」搞到AY面都紅晒，再三強調自己「真係無呢個（生仔）計劃啊！」郭醫生聽到再搞笑話，相信傳媒關心AY係有心無力定有心有力，AY就話呢啲問題，佢只會對一個人負責，話呢啲無謂喺傳媒面前披露，亦都「無必要吹噓」喎！