在香港紅極一時的美國男歌手Tommy Page，在美國時間周六因自殺離世，終年46歲。現任香港酒評人協會主席的劉偉民（Ronny），90年代在EMI、華納、滾石及寶麗金等唱片公司工作，與Tommy Page多次合作，他今日受訪時對好友離世感到惋惜。

Ronny繼續憶述故友往事：「另一個可能大家唔係好知關於Tommy Page嘅事，o依家好多人講話Suede嘅Brett Anderson係住喺旺角，如果係講Tommy，佢就係住喺尖沙嘴，因為佢喺尖沙嘴係相當之熟路，佢經常嚟都係住喺尖沙嘴區。後來Tommy嘅音樂事業都係唔係咁順利，可能真係因為外表影響咗，因為仍然好多人當佢偶像歌手，到偶像歌手潮沒落嘅時候，佢亦好難再喺呢個樂壇競爭。」

「好唔好彩，最後唱片公司都drop咗佢解咗約，完咗約之後冇同佢續約，結果佢好厲害咁走咗去New York一間大學修讀行政管理，讀完之後佢居然再走番入去華納做，今次就唔係做artist，今次係做行政，包括佢曾經做過A&R嘅高層，同埋promoton嘅副總裁，做到好高級。佢其實證明番自己好有用，亦唔係剩係得個樣，其實佢都好叻，做到一啲行政工作嘅人，最厲害係佢居然返番去同一間公司度。」

「佢做唱片公司或者係做artist嘅時候同我哋傾偈，佢好明白一樣嘢，我哋喺唱片行係非常之重視Billboard呢本雜誌，後尾佢就加入咗Billboard度做associate publisher，到最後升職升到publisher出版人添。所以你知道佢鬥心其實係幾咁強，同埋佢係一個好有目標嘅人，相當之聰明。收到佢自殺消息真係好詫異，不過都好難講，佢俾抑鬱症都折磨咗一段時間，都係因為個病令到佢有咁嘅決定。」