當年今日
關於我們

【一開張就出事】洗米仔拍賣app冧server Credit全數回贈補飛

蘋果日報 2017/06/16 10:37

周柏豪出事洗米仔serverOction

靠自己唔使老竇課金嘅洗米仔周柏豪,佢同友人一齊創立嘅「一仙拍賣」 (Penny Auction)拍賣app「Oction」,上線喇。
點知,呢個「一仙拍賣」,就出事……
之前《蘋果》財經版幫洗米仔拆解過呢個app點樣運作,原理就係,產品由0蚊起叫價,每一次bid價錢都只會上升$0.01,即係1仙,用戶每落一個bid,就要用1個Credit,每個Credit價錢為0.8元至4元。如果出價後10秒內都沒有人再出價,你就bid到呢件貨品。而每個Credit,就好似籌碼咁,贏家可以用低價買到iPhone,輸家就失去其籌碼。「Oction」設有「Buy Now」的選擇,用原價購買產品,投入的Credit將全數回贈。(詳情睇呢度: http://bit.ly/2t8xIXS )
咁出咗咩事呢?server有事。Oction今晨發聲明,表示首日(即6月15日)之所有Oction拍賣出現各種不同之問題,故是日所有已用之Credit全數回贈所有用家,而勝出該拍賣者,仍然可以以其勝出價購買該產品。聲明又強調Oction會繼續運作,繼續改善。
香港時間凌晨4點左右,洗米仔拍咗條片放上Oction官方fb,…佢話:「今日係我哋Oction嘅大日子,我哋今日做第一個拍賣,(沉吟半晌)今日我想同大家分享嘅就係,我覺得我哋嘅籌備做得唔好。我亦都想同大家講一聲對唔住同唔好意思。」此時洗米仔已經一臉失落。
咁發生乜嘢事呢?「我哋冇預計到大家反應原來係咁踴躍,我冇預計到原來同一時間係有幾千人bid部iPhone,咁但係呢個唔係大家嘅問題,而係我嘅疏忽。我大意,我希望大家可以原諒我。」
「其實今日,因為server問題,有啲人玩唔到,有啲人bid唔到,有啲人買credit有問題,有啲人贏咗嘅話……總之係有好多小事發生。同一時間有啲人落咗credit,真金白銀買咗credit,亦都未必玩到。」又捫心續說:「From the bottom of my heart,我同大家講聲,對唔住。」「我覺得我自己疏忽咗對你哋嘅責任。」
洗米仔話,雖然出事,但Oction都做咗四單拍賣,但因為server問題,所以呢啲oction都只係100人以下先至玩到,包括一部iPhone,用$8.54(美金)賣出去。
跟住洗米仔再次道歉,又表示首日拍賣,所有credit都會全部退番晒俾用戶,又承諾將來所有有問題之拍賣,經查證後,所有credit會全數退回。
洗米仔謂希望今日發生的事不會令大家對佢哋失去信心,之後再次致歉並承諾繼續改善,「如果我哋係真係搞唔掂嘅話,所有credit都會俾番晒你哋。對唔住!多謝你哋!」
empty