當年今日
關於我們

【韓流】避開黃安?周子瑜唔返台灣過年

蘋果日報 2016/02/08 06:00

蘋果台灣香港韓國過年台獨即時農曆年周子瑜黃安

韓國女團TWICE嘅16歲台灣成員周子瑜今個農曆年決定唔返台灣過年,據知子瑜之前同TWICE隊友已經錄好晒《2016偶像明星運動會》呢啲新年節目,暫時亦未有工作,佢所屬嘅JYP事務所就話:「佢哋可以自由選擇回家過節,或者留喺公司練歌練舞,但子瑜同嚟自日本嘅Momo、Mina同Sana等4位外國成員,佢哋都唔會回國同家人團聚。」

子瑜自從上月被台灣過氣藝人黃安檢舉做「台獨份子」後,成為新聞人物,由於早前已有傳媒報道黃安將於今個月返台,而佢已於日前低調抵台,唔知子瑜係唔係怕喺台灣撞正佢,所以就選擇唔返台灣過年。不過今日黃安已返回內地,所以子瑜都唔使擔心得咁多。

而有傳國二就休學嘅子瑜,過年後將返回台灣考取國中同等學歷,之後會再到韓國繼續念高中,不過時間暫時就未定。另外,子瑜噚日與隊友上載新照,祝粉絲新年快樂。