劉小麗撤銷宣誓案上訴，意味九龍西稍後又要補選！由於呢次建制派要成功再偷雞難度較上次大，所以至今未見協調一人代披甲，但見上次民建聯已由鄭泳舜隆重登場，另一愛國政團經民聯相信都會酸溜溜，覺得呢次仲唔輪到佢哋嘅新星出戰？所以近期力谷深水埗區議員梁文廣，希望佢可以獲薦上陣。

其實經民聯一班大佬早前已經不停同梁文廣現身，提早為佢造勢，今日又有另一場抬轎大龍鳳，經民聯邀請咗運輸及房屋局局長陳帆一齊落區視察石硤尾邨。點解係石硤尾邨？除咗嗰度樓齡近40年單位殘缺破舊，相信都係因為嗰度係九龍西選區，梁文廣可以傍住出巡向局長反映「重建屋邨，原區安置」意見，仲唔係提早「成功爭取」？

唔知梵哥有冇發覺其實自己係個大配角？但就算係，相信佢都擔綱得幾happy，因為佢原來幾熟悉石硤尾邨，仲同經民聯要員一齊喺邨內街坊茶寮飲早茶，食雞扎同鵪鶉蛋燒賣，梵哥笑稱搵到當年嘅味道喎！