一間公司股價低殘，回購或增持可謂指定動作，亦屬理所當然，但如果在回購頻頻下，主要股東卻大手減持，又所謂何事呢？
主要產銷鋼水控流產品嘅華耐控股（1020），由9月中起不斷回購，截至周一共回購3,822萬股，平均價0.5元。由頻密程度及數量睇，均反映公司屆超值價水平。不過，周一披露權益顯示，主要股東兼主席徐葉君減持1.3億股，每股作價0.51元，減持後持股量降至12.47%，同日Win All Management Limited宣佈持有華耐1.3億股（8.1%）股權，作價同樣是0.51元，大有可能是接了部份徐葉君持貨。
主要股東大手減持看似突然，但睇番近一年公司嘅動作，其實早有先兆。去年9月，現時第二大股東陳洪，向前非執董高志龍及張蘭購入1.93億股或17.73%，並立即委任趙平及何旭晞為執行董事，成功奪得主導權。今年7月，華耐宣佈就收購護欄供應及安裝業務訂立諒解備忘錄，賣方最終實益擁有人正正是陳洪！種種迹象顯示，陳洪將成為華耐嘅揸fit人。