生日好多時會祝福壽星年年有今日，歲歲有今朝，對於噚日40歲牛一嘅有線前主播劉家聰，今年生日意義重大，因為佢今年初發現有腦瘤，聽從醫生吩咐要立即安排入院做手術。

劉家聰一直活躍社交圈，樂於跟友人分享生活點滴，但1月18日忽然喺Instagram留言：「嚟到今日，日子已不多，我信我，正能量會戰勝一切。多謝我兄長Kelvin安排，好彩沿途有你。」佢冇交代發生咩事，過咗幾日Ig貼出剃頭相，劉家聰仲係笑住面對鏡頭，1月22日，已剃頭戴帽嘅佢又發文：「好…六點正需要起床啦！！萬事準備充足（其實已準備兩個星期）不論個人情緒及爆棚意志（因為我好幸福，有家人、兄長、朋友、老防兄弟、工友及中學同學等等），萬事俱備，整裝待發，上場打漂亮一仗，Fighting。」

原來劉家聰腦有一個6厘米大嘅瘤，壓住左手左腳嘅神經線，必須要立即進行開腦手術，1月22日佢就一早入院，做咗長達7小時開腦手術，佢由手術室推出來，仲要留喺ICU觀察，農曆新年已出院返家跟妻女團聚，經過一個多月休息，佢身體康復進度理想。劉家聰近日再重返社交圈。

《蘋果》噚日致電劉家聰，問到佢點發現有腦瘤，佢接受電話訪問時話：「我一直好鍾意跑步，幾乎每日都會去跑下，但大約半年前，我出動做娛樂新聞採訪工作訪問，我發現好容易攰，上山跑又失平衡，我以為工作太攰所致，因為喺有線工作期間，工作壓力好大，有時會唔夠瞓，為咗健康，我辭咗職。」劉家聰仲嘗試去啪骨同針灸，但都係冇幫助，朋友介紹佢去睇運動創傷科，仍然冇效，今年初，醫生轉介佢看神經科，希望找出病源：「醫生安排我照磁力共振，我曾傷過腰，我怕同脊椎神經傷有關，逐part照，一直追住照到上腦，源頭出現咗，我腦有一個6cm瘤，十日內安排要做手術。」劉家聰當時離職有線，進私家醫院開腦嘅幾十萬手術費只得自付，佢話：「冇辦法，始終屋企人同健康先最重要，冇好身體又點去工作。」

精選娛聞，喺晒《娛果》
http://fb.com/appledailyent