黃心穎今日下晝現身奧海城，為護膚品店活動擔任嘉賓，啱啱放完假嘅佢早前喺網上大晒泳衣相（新聞連結： https://bit.ly/2oNPxdY ），心穎透露喺泰國蘇梅島玩咗5日，佢話：「原本係諗住去大阪，但係因天氣問題所以臨時轉咗去蘇梅島，我自己都係第一次去陽光與海灘嘅地方，以前我唔會去，一嚟怕曬黑二嚟唔識游水，但今次之後就鍾意咗，仲第一次玩浮潛。」佢話為咗今次旅行，仲特登出發前一日網購咗新泳衣。

問到今次係咪同男友馬國明去？心穎笑笑口話：「係嘅，咪佢囉。」又直認泳衣相由馬明操刀：「多謝佢幫我影得咁靚，佢平時好少揸相機，影相要好大耐性，全靠佢，因為我又冇腳㗱。」心穎話之前馬明拍劇時曾經飾演攝影師，唔知係咪因為咁苦練過攝影技術，今次影出嚟攞嘅角度佢好滿意。

心穎又表示希望下次旅行都可以去陽光與海灘嘅地方，問到下一次係咪即係去度蜜月？佢話：「邊有咁快，我嚟緊要去加拿大做嘢，跟住家姐結婚又要飛，再旅行都冇咁快。」近來圈中好多人都有喜訊，幾時輪到你哋？心穎話：「呢啲嘢唔係講潮流嘅，我都有恭喜單文柔同陳展鵬。」

精選娛聞，喺晒《娛果》
http://fb.com/appledailyent