工權媽媽組｜丈夫工業意外亡 單親媽為子自強不息
蘋果日報 2020/09/29 18:23
「我覺得好可憐，因為冇咗爸爸，其實我好明白自細冇咗爸爸嗰啲痛，因為我自細都係單親家庭長大，我從來都冇諗過我自己下一代都係單親家庭長大。」中秋佳節人月兩圓，但對阿田與5歲大兒子文迪來說，卻是觸景傷情日子，丈夫阿培4年前因一場離奇工業意外身亡，還未曾與當時只有7個月大的文迪點燈籠、吃月餅過中秋便離撒手人寰，遺下兩母子相依為命，時間飛逝，任憑再肝腸寸斷，終歸要堅強活下去，「我會同佢講我過得好好，叫佢唔使擔心，佢仔我都會照顧好，佢爸媽我都會照顧好。」
工業傷亡權益會廚房內，幾位「媽媽組」們分工合作，有洗咸蛋的、有搓蓮蓉的，大家正為工權會製作中秋月餅義賣，她們都是工業傷亡遺囑，阿田已經連續當義工數年，「梁姑娘介紹咗好多媽媽畀我識，我好明白佢哋先生走嗰種徬徨，嗰種無助。」
阿田從來都不是溫室長大的小花，父親在她小時候意外墮涯身亡，她10歲後就被送往寄宿學校，家庭溫暖對她來說只是4個陌生字，故從小就渴望擁有自己的家，「我最渴望最希望係有一個完整嘅家…我細個時好羨慕人哋，一家人齊齊整整坐喺度食飯，我一路都希望我將來嘅家係咁。」
可是禍福無常，好日子太短了，2016年3月30日，在將軍澳任職運輸工的阿培，在飛機輪胎維修中心卸下飛機輪胎時，其間底部的輪胎突然爆開，氣流撞起上方的輪胎飛彈，阿培走避不及，頭部及臉部被飛胎擊中重創倒地，昏迷不醒，送院搶救不治，遺下阿田與當時只有7個月大的文迪，生命頓時由天堂跌落地獄。
「老婆，你帶住個仔，喺邊度等我呀，我哋去食下午茶。」阿培是愛妻號，習慣每日放工前會致電老婆，相約放工後到處飲飲食食，享受天倫，可惜這是夫妻間最後的一次對話，相隔廿多分鐘後，丈夫同事突然來電，告知阿培嚴重受傷，血流如注，要阿田立即趕去醫院，可憐阿培當時已經走到生命最後關頭。
「咁多年，我唯一就諗起佢走時真係太辛苦，因為佢打強心針，打咗十幾支，來來回回，冇咗心跳，之後有返心跳，十幾次，都堅持咗三個幾鐘，我覺得佢真係好唔想離開呢個世界，好唔想離開呢個世界，但都冇辦法，最尾都係走咗，但係如果佢打咗咁針，最尾如果有咗呼吸都冇用，都係植物人，所以對佢嚟講都係一種解脫。」一直表現堅強的阿田，憶及殘忍往事，只能垂淚。
丈夫因工業意外身亡，遺下阿田與7個月大兒子，公司代表上門探訪丟下100元利是慰問金，可以想像到當中傷痛及徬徨不可終日，阿田過著喪屍般沒靈魂日子，曾經想過自殺，有一次更差點過發生交通意外，幸得工權會一直從旁協助及安撫，阿田意識到兒子尚少，日子總得要過，阿田稱要為兒子立一個好榜樣，決定咬緊牙根，母兼父職，不但上堂增值自己，而且更找工作拒領綜援，要自己及兒子有尊嚴地生活，「要堅強啲，陪我仔好好長大....出面有好多嗰啲課程可以學，我就去上課，不停去上英文堂、一啲點樣去增加自信，同埋時間管理，好多嘢，我大概上咗大半年，識咗好多同學，好多buddy，佢哋都好支持我，我出嚟做嘢，我喺香港第一份工就係喺養和醫院做reception。」
當阿田努力地生活，但兒子開始懂事，看見別的小朋友有爸爸，開始經常追問阿田「我爸爸喺邊」，樣子身型與阿培如餅印一樣的文迪今年已經5歲，作為母親，她心疼兒子要在單親環境下成長，「我覺得好可憐，因為冇咗爸爸，其實我好明白自細冇咗爸爸嗰啲痛，因為我自細都係單親家庭長大，我從來都冇諗過我自己下一代都係單親家庭長大。」
月到中秋份外明，時間慢慢沖淡了喪夫之痛，阿田與往年一樣，會偕兒子與老爺奶奶做節共度中秋，希望珍惜眼前人，「好多人都問我，點解你先生走咗，但你日子過得咁好，你係咪攞咗綜援，好多人都問我，我話自己有手有腳，我自己出嚟做嘢，我都可以搵到錢，我話做乜攞綜援，我都咁樣答佢，佢哋話咁樣你咪好辛苦，我話辛苦時自己都開心，自己賺到錢，知道呢個錢係點樣嚟，你洗錢先洗得開心，洗得安樂。」
丈夫意外身亡後，阿田母兼父職，為兒子自強不息。
阿田心疼兒子要在單親環境下成長。
時間慢慢沖淡喪夫之痛，阿田與往年一樣，會偕兒子與老爺奶奶做節共度中秋，希望珍惜眼前人。
任職運輸工的阿培，在卸下飛機輪胎時，底部的輪胎突然爆開，氣流撞起上方的輪胎飛彈，阿培走避不及，頭部及臉部重創，送院不治，遺下妻子阿田與當時只有7個月大的兒子文迪。
涉事意外中飛彈的飛機輪胎。
工權媽媽組｜遺屬繼承工權鬥士精神 憶良師宏大愛宣傳職安健
2021/04/28 16:37
工業傷亡權益會旗下的「媽媽組」於九十年代已經成立，主要聚集一班工業意外傷亡的遺屬，希望透過定期舉行活動去互相支持及紓緩壓力，當冷電工程的志鴻，5歲時父親因肺塵病過身，開始隨母親及其餘5兄弟姊妹接觸工權會，並參與媽媽組活動。他指工權會及媽媽組就如一個大家庭，故14歲開始至今10年，志鴻一直有到工權會當義工，積極推行職安健訊息予社會各階層。
他坦言若當年職安健意識高，父親亦未必會因長期吸入有毒塵埃而患病身亡，「因為唔單止一個人事，因為你背後可能背負住你屋企人，同埋你其實係家庭經濟支柱，真係你去喪失咗生命，你有冇諗過你屋企人係點呢？」
志鴻生長於大家庭，共有6兄弟姊妹，他排行第5，母親是全職家庭主婦，做工程的父親是經濟支柱，以一人之力養活一家8口，生活清貧但一家人齊齊整整，也算幸福快樂。但由於父親長期要到地盤工作，日復日、年復年地吸入有毒塵埃，終於得出肺塵病身亡，當年志鴻只得5歲。
曾經少不更事的他，現時已經是工權會職安健推廣大使，他把父親之死歸咎於社會整體職安健薄弱意識，「當年工人真係為求方便，唔戴口罩，啲防塵口罩，而去繼續喺地盤工作，當年石棉可能未禁止，石棉對肺部來說係好嚴重傷害，當年冇咁意識，政府冇去禁呢啲嘢，都係怪當年意識唔夠高。」
父親過身後，遺下妻子及6名子女，大女當時只有15歲，孻仔更年僅2歲，一家7口頓失依靠。工權會除了為遺屬爭取合法合理賠償，亦關顧遺屬心理及精神健康，志鴻母親當年亦有參與媽媽組活動，「工權會幫助我哋點樣去追討返賠償，同埋心理上都畀咗我阿媽好大支持…（媽媽）好低落，好傷心，因為自己老公走咗，又冇咗經濟支柱…不斷同佢傾吓偈，或者搵佢參與多啲活動，等我阿媽唔會諗返啲傷心事。」
媽媽組在每年重要節日，都會集合一班媽媽製作做節食品，例如過年整年糕、角仔、端午節包糭子、中秋節則製作月餅送暖，每年亦會舉辦工作坊及旅行等活動，讓一家大細都可以參加，「係一個大家庭，因為「媽媽組」唔單止有阿媽，亦有小朋友，我哋啲小朋友會有玩、可能每年暑假我哋細細個都會有一個宿營，等一個大家庭咁一齊去玩。」
在去年終過身的工權會總幹事陳錦康，從小到大都是志鴻的良師益友，對這位工權鬥士的離世，他亦感到十分可惜，「細細個成日參加工權會活動，佢（陳錦康）一見到我哋一定叫我哋要畀心機讀書，聽阿媽話嗰啲，佢係好關注我哋每個小朋友成績，及學業上有咩困難，因為佢哋如我哋學習有困難，佢都會盡量去搵人或者義工去幫我哋補習，佢其實好關心我哋小朋友情況。」
志鴻十分認同工權會理念，自14歲開始便經常當義工，近年更主力參與宣傳職安健訊息，希望減低工業傷亡意外率，「如果冇接觸過工權會，我都唔會知道香港原來每年有咁多單工業意外，單單今年年頭到現在，都發生咗好多工業意外，有人死，當年自己感受過一樣嘅嘢，同埋可以推廣返職業安全畀大眾工人，同埋唔單止地盤，其實任何工種都有機會有危險，提高返職業安全意識，等佢哋唔會有悲劇發生時先嚟後悔。」
-----------------------------
你敢爆，我敢獎！ 立即WhatsApp 《蘋果》24小時爆相爆片熱線 或致電：63836568
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
工權媽媽組｜丈夫猝死又患肝硬化 寵物美容師望女兒成材
2020/09/29 10:39
「希望你保佑我長命啲，陪BB多啲，保佑婷婷快高長大，聰明伶俐，身體健康…我話你喺天上可以放心，唔需要掛念我哋，但係講係咁講，每一次望住個月亮都喺度喊。」阿麗屬工權會「媽媽組」新人，丈夫志鋒去年10月2日在工作期間突然身亡，後死因庭指死因乃心臟病，遺下妻子阿麗及一歲多女兒婷婷。由於本港勞工法例落後與不足，阿麗丈夫並不屬於工業傷亡法例保障範疇，故並沒有得到任何法定賠償，屋漏偏逢連夜雨，阿麗在丈夫離世後不久，在體檢時發現自己患上中後期肝硬化，她只能望有更多時日，看着女兒成長。
丈夫志鋒自小便與家人鬧翻，廿歲便離家出走，從小便缺乏家庭溫暖，直至遇上阿麗，拍拖3年後於2015年共諧連理，開始建立自己的家，3年後喜獲千金，生活好不美滿，「佢好開心，佢話佢好想要個女， 唔希望似佢，希望孝孝順順，健健康康，讀書叻啲，有出色啲，因為佢細個年少不更事，同屋企人嘈交，佢想每一年過年都開開心心團年一齊，佢唔想嗌交。」
原本一直在廚房工作的志鋒，並沒有太大上進心，但阿麗勉勵他努力上進，為將來美好生活打拼，結果志鋒發奮工作，後更升任至廚房大佬，可是二人由拍拖至結婚，只度過短短8年的幸福時光。去年10月3日，兩公婆原訂一起回鄉參加姨仔婚禮，豈料就在放假前一日，即10月2日，丈夫志鋒在落場小休期間竟一睡不起，當時在元朗任職寵物美容師的阿麗，沒想到就此與丈夫天人永訣，「啲同事去嗌佢嗌極都唔醒，隻手直頭係跌落地下，摸佢都係凍冰冰都已經冇氣。」
死因庭後來裁定丈夫死於心臟病發，享年37歲。阿麗稱丈夫身體一直健康，亦不曾知道患上心臟病，壯年猝死，令她方寸盡失，前路茫茫，可是惡耗陸續有來，阿麗舅父在丈夫離世不久因肝硬化離世，本身不幸家族遺傳乙型肝炎的她即時去做身體檢查，醫生告知她亦出現肝硬化，而且更是中晚期階段。
「我都唔知佢以後點算，如果畀我捱到佢18歲，唔好話捱到18歲，畀我捱多10年，等佢可以獨立自立啲，咁我走都走得安心。」兩歲半的女兒婷婷此刻天真爛漫的坐在嬰兒車上望著母親，她並不知道父親已在她生命中消失，更不知道母親亦患有肝硬化重病。
既要獨力撫養女兒，又要照顧自己身體狀況，阿麗過去一年身心俱疲。但這位「媽媽組」新成員，仍抽空到工權會幫手整月餅，一方面報答工權會一直以來提供的協助，另一方面亦好讓自己可藉着專注製月餅從而忘記壓力，畢竟中秋節對她及女兒來說都是一個美好回憶，「其實有同爸爸（志鋒）過個一次中秋，爸爸好開心…一齊切月餅，一齊去買個碌柚，冇估到佢走得咁快…佢啲相都冇影多幾張。」阿麗只寄望天上丈夫守護她能長命百歲，陪伴女兒成長。
-----------------------------
你敢爆，我敢獎！ 立即WhatsApp 《蘋果》24小時爆相爆片熱線 或致電：63836568
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
工權媽媽組｜工傷遺屬走出傷痛 中秋節DIY月餅義賣
2020/09/29 10:09
工權媽媽組工業意外中秋節娘作月餅工權會
月到中秋份外圓，大約十多位工業傷亡權益會新舊「媽媽組」成員，花了10天時間，趕工製作了1,200盒月餅，今年並印上「娘作」為品牌，向外推廣媽媽組作義賣，去年工權鬥士陳錦康離世，接棒總幹事一職的蕭倩文表示，媽媽組是由一班工業傷亡遺屬所組成的組別，屬工權會轄下，由九十年代成立至今，成員約有三千多人，「佢哋就喺背後默默耕耘，製作唔同節日食品，但主要送返畀啲工友，以及一啲支持者及友好。今年糭開始轉為一個義賣形式，希望畀公眾都可以品嚐佢手藝，從而希望如果可以帶來一啲收入就更好啦，因為可以投入返服務幫更多的人。」
3,000 多位媽媽組成員中，由廿多歲至七十多歲都有，當中活躍會員約百多人，有些成員甚至超過二十年，在食品製作工場內，十多位新舊媽媽組成員分工合作，大部份都是熟手技工，在洗咸蛋、搓皮、掃油、印模過程中，媽媽們有傾有講，暫時拋開傷痛。
負責搓餡的珍姐8年前開始加入媽媽組，每年都會幫手製作月餅，她表示任職水喉匠的丈夫於2011年工作期間因發生爆炸，奪去寶貴性命，她感激工權會幫忙，而且一班媽媽組同路人互相傾訴，漸漸解開心結，「初初嗰時係愛姐（工權會職員）佢哋、陳生（已故前總幹事陳錦康）佢哋去我屋企，幫我爭取殮葬費，之後愛姐叫我得閒上去，同啲媽媽會面吓，傾吓，唔使成日鬱住喺屋企咁唔開心…做人我好睇得開，每個人經歷個階段你就要行，唔可以停喺度，仲要屋企咁多人，我唔想屋企人成日擔心我呢樣嗰樣....所以我都叫啲仔，小朋友唔使擔心我。」
中秋節是一家團圓的大日子，不過對工業傷亡權益會「媽媽組」成員來說，卻別有一番滋味在心頭，媽媽組屬工權會轄下，在她們眼中，中秋節月亮再圓，也永遠缺少了摯親的一塊，每年大時大節如過年、端午節及中秋節，她們均會製作應節食品，送暖予工友及工權會友好，藉此互相鼓勵及送上祝福，今年改以義賣形式，蕭倩文坦言以媽媽組「娘作」品牌，是希望發掘新資源，「媽媽組品牌我哋叫「娘作」…...因咁多年媽媽組製作食品，節日食品，今次機緣巧合下同一個工場合作…呢排就係講緊月餅，希望推廣「娘作」呢個品牌畀大眾知多啲，從而畀社會知道存在著一個咁嘅群體，喺度努力更生。」
除了製作應節食品，媽媽組亦有一系列活動，希望在協助遺屬處理前期實際需要，如爭取賠償、協助處理身後事外，亦可以進一步能中長期地關顧遺屬情緒及心理健康，「輕鬆啲如旅行、一啲聚會，如母親節我哋會搞聚會，聖誕節會搞聚會，甚至一啲公司會贊助佢哋參觀活動，然後提供一啲餐飲，另都有成績進步獎，都大型，每一年有間公司贊助，去鼓勵小朋友讀書好努力，有進步，就會有自助餐畀佢哋。」
媽媽組每一個成員背後都有一段悲慘經歷，工業意外一宗也嫌多，除了會出現人命傷亡，亦摧毀一個家庭幸福，根據勞工處資料顯示，去年全年工業意外死亡數字達249宗，是五年來最多，而今年首季亦有44宗工業意外死亡事故，而工業傷亡意外當中，建造業依然是重災區，2019年建造業工業意外死亡事故達16宗，受傷個案亦高達2,947宗，蕭倩文坦言數字未能反映實際情況，「 始終佢哋存在著一啲文化，唔係好想呈報，有時除咗僱主，有時僱員自己擔心無咗份工，都未必想呈報，加上佢哋好多時想用私下解決方法…原因可能影響到佢哋投標，承建商下一期投標…因為如果傷亡數字越高，扣分會多，直接影響到佢哋能唔能夠成功投標。」
她表示工權會會繼續推廣職業安全訊息及服務工傷、職業病及職業傷亡遺屬，至於向政府爭取多年要求成立的工殤紀念日，雖然仍然未見曙光，但承諾不會放棄，繼續爭取，「近年佢哋（政府）都冇回應，以前都仲會講幾句，如認為係負面嗰啲，但近年都冇回應，但我哋都會照寄信去，寄簽名去。」
-----------------------------
你敢爆，我敢獎！ 立即WhatsApp 《蘋果》24小時爆相爆片熱線 或致電：63836568
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
-----------------------------
你敢爆，我敢獎！ 立即WhatsApp 《蘋果》24小時爆相爆片熱線 或致電：63836568
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！