「頭號梁粉」、報章專欄作家屈穎妍喺報章撰文，竟然向特首林鄭月娥發炮，仲要字字狠辣，句句誅心，背後有乜玄機，有待高人分析。但八方留意到，屈穎妍喺文中搬出「勞工法例第509章職業安全及健康條例」，指「在無法提供及維持安全進出工作環境地點的途徑下，勞工處其實有權發出停工令」，究竟又係咪真呢？

八方睇返條例，屈小姐提及應該係香港法例509章《職業安全及健康條例》，導言已開宗明義講明，條例目的是「確保在『工作中』的僱員的安全及健康」。屈小姐文中指控，應該係節錄自勞工處網站，指僱主有責任「提供及維持安全進出工作地點的途徑；以及提供及維持安全及健康的工作環境」。

不過，八方向勞工處了解過，所指的「途徑」，一般指進出工作地點的環境如門口及通道等，僱主有責任確保僱員進出工作地點嘅安全與健康。如有違法，勞工處可向僱主簽發敦促改善通知書及暫時停工通知書，以防止工作地點嘅活動對僱員構成即時危險。僱主如未能遵從通知書規定，即屬犯罪，可分別處以罰款港幣20萬元和50萬元，以及監禁長至12個月。