下星期就踏入羊年,Lulu預祝大家要「咩」有「咩」,羊年順順利利。啱啱嗰輪英超,最驚喜當然係巴神終於開齋。而曼聯贏波,竟然有兩球係來自前一場只係踢咗幾十秒嘅後衞基斯史摩寧,都係呢個星期嘅亮點。
講開曼聯,近來越來越多嘢講嘅史高斯,早排就雲高爾反擊艾拿迪斯一事,向呢位紅魔領隊講:「點解你要對韋斯咸主帥嘅言論有咁嘅反應?如果係車路士或者曼城主帥,情況會有啲唔同。考慮晒所有情況之後,你要知道,你係曼聯領隊。坦白講,我對呢件事感到好奇怪,因為對於艾拿迪斯嘅言論,我第一個感覺,就係好輕鬆、佢喺度講緊笑。」其實類似嘅抨擊,喺上年都出現過喺莫耶斯身上好多次,最後佢亦喺成績下滑、軍心不穩、高層唔信任嘅情況下被炒。