當年今日
關於我們

【李八方online】中環新翠華下午茶兩舊水?薄餅疏乎里都有

蘋果日報 2015/12/11 06:00

中環翠華奶油豬李八方ONLINE英式下午茶

叱吒老蘭蒲精界、人稱「照妖鏡」嘅中環翠華餐廳,闊別近3個月,今日終於回歸中環威靈頓街喇!話晒係翠華首間旗艦店,下晝4點幾開幕,一行20人嘅銀樂隊浩浩盪盪由國際金融中心遊行到翠華新店,約15個警察在場維持秩序,仲有3個20吋大嘅翠華奶油豬賀新店,認真巴閉。

重新裝修嘅中環翠華,金碧輝煌,同對面嘅鏞記好鬼似樣,翠華品牌發展主管Kenji話,舖門面用土豪金唔係為咗同鏞記打對台,亦唔係為咗搶大陸客,而係想畀大家一個新形象喎。新翠華外面土豪,裡面似屋邨,加入咗唔少屋邨特色,例如鐵線玻璃同吊燈,Kenji話新裝修係特登喺每張枱上面都放大大盞吊燈,光猛啲,照得更清楚,但就否認想將「照妖鏡」嘅翠華特有功能發揚光大去幫蒲精照清新伴侶嘅花容月貌。

不得不提嘅係新翠華嘅餐單,無論喺價錢上定食物上,完全打破茶記嘅固有概念,而且暫時係旗艦店獨有,竟然有賣成$198嘅二人英式下午茶,對住三層式嘅英式點心架,喺茶記hightea,係就係平過酒店,但以茶記而言,個價係真心貴。夜晚仲有$68奶茶加疏乎里套餐,又有意式風乾火腿pizza,價錢就唔算平,但以後蒲精們可以有多個選擇,唔使淨係食魚蛋河喇。