CCTVB死心不息要將大陸文化強行灌輸入香港，包括推出普簡台(香港人仲記得嗎？)，配音組大地震，好多外購劇都冇咗粵語配音；仲有就係，繼續喺黃金時段播大陸劇。唔係J2唔係收費台，而係翡翠台。由《武則天》、《無心法師》到《琅琊榜》，仲有買咗嘅《羋月傳》，死未？

係係係，好多人睇完呢幾套大陸劇之後都話好睇，但始終人人口味都唔同，而且呢套係男人劇，師奶唔感興趣好正常，再加上喺網上煲劇同睇大台刪剪版根本就係兩回事，所以即使套劇口碑幾好，擺喺大台播迫人睇，觀眾係可以選擇唔睇！

好多網民都話，《琅琊榜》收視仲衰過無綫之前播嘅大陸劇《西遊記》，係，就係嗰隻肉酸到唔恨嘅《西遊記》，擺喺大台八點半呢個合家歡黃金時段，號稱用咗一億人民幣打造，仲係《魔戒》嘅幕後班底合力打造喎，真係……當時負責硬銷此劇嘅係節目部總監何冠中。最重要仲係，播完55集後，啱啱好同6月世界盃接軌，終獲集團總經理李寶安拍板買入。

香港網民曾許下鴻圖大志，謂要將《西遊記》收視推到單位數，但可惜，口裡說不，身體很誠實，《西》收視差極最低一次都有18點，平均有20點左右，今次《琅琊榜》就真係差好多。

2014年仲未有ViuTV，冇節目送飯惟有睇呢啲。今時今日？

無綫以周六日一日播兩集但求盡快「去貨」，形同懲罰觀眾，咁今次觀眾又有咩回應？