葉楚航季初出馬多，不少馬熱身開氣後能夠提升名次，像「紅星」上名後再出補中，剛戰亦有「漸信名駒」熱完身上名，本周三谷戰葉廐七匹正選大多已熱身，當中三班1800米的「可愛寶」首戰田草小試牛刀追近，今次返主場谷草機會到位。

全季總共有88次賽事，今季暫時只舉行了4次，好似跑一場2400米長途賽事，目前只起步階段。實力雄厚的大馬房如蔡約翰、告東尼及大摩，當然不急於早段搶放，通常下半程才發力加速，最終衝線時仍可以趕上前列，甚至問鼎冠軍。翻查今季紀錄，這三個馬房僅七駒成為大熱門，只有蔡廐「首映」贏馬，由此可見季初不宜過份追捧呢類大馬房。

相反，馬匹數目多的華籍馬房，在季初賽事出馬相當踴躍，今季暫時出馬次數最多的三個馬房，順序為徐雨石(45次)、沈集成(38次)及葉楚航(34次)，而他們合共取得10冠9亞10季，其中15倍以下的實力馬，上名率就更加高。

本星期三谷草夜賽，葉楚航上陣馬季內都曾經跑過一場熱身，三班1800米的「可愛寶」上仗田草1600米輸兩馬位得第六，名次不起眼，但走勢非常悅目，沿途走外疊望空，步速太慢而搶口難留，前中段跑得不順，但直路依然後追強勁，末段22秒08全場最快，走勢可人。今仗回師首本場地，同場有「勁有波幅」及「盈豐駿駒」放頭，會有正常步速，形勢合晒佢跑，贏面最高。