西北太平洋超強颱風「山竹」預計聽日殺到香港，唔少人為預防玻璃爆裂，會喺玻璃上黐膠紙，引起咗一陣膠紙搶購潮，其中皺紋膠紙被搶瘋搶至缺貨，更有傳一卷皺紋膠紙被炒至$80一卷。

唔少市民喺黐膠紙時都悶中作樂，發揮無限創意，有貨車喺車頭擋風玻璃拼出「未供完」，希望愛車可以順利捱過狂風；有市民「走火入魔」，連眼鏡上嘅玻璃都黐埋；亦有人喺膠紙寫上九字真言「臨兵鬥者皆陣列在前」，試圖用秘術為玻璃窗施上結界。