當年今日

隔牆有耳:噪音之都名震《華爾街日報》 - 李八方

蘋果日報 2011/02/03 00:00


香港空氣質素差令好多老外卻步,甚至影響投資意欲,現時連噪音都越來越嚴重,令居港外籍人士頂唔順,「噪音之都」名震《華爾街日報》。該報報道半山居民飽受地盤噪音滋擾,訪問附近豪宅居民,指附近地盤工程噪音令大廈震盪,只有周日工程暫停先有安寧。
報道指堅道一帶同時有六個地盤施工,幾個地盤日日打樁,噪到人都癲。現時法例管制地盤噪音,由環保署執法,超標者可能被檢控,點解仲會有過量聲浪擾民呢?原來批准施工嘅屋宇署只負責審批工程是否符合安全,唔考慮同一地區幾個地盤同時開工,噪音倍增嘅因素,《華爾街日報》指呢個法例漏洞,就係造成噪音擾民嘅原因。報道引述半山居民稱,面對噪音惟有習慣成自然,即使搬去第二區都不得安寧,因為政府部門各自為政,全港都有同樣情況,避無可避。