當年今日
關於我們

【李八方online】公民黨90後新星 青衣強攻麥美娟

蘋果日報 2018/12/20 17:49

麥美娟冼豪輝青衣偉盈選區

2015年區議會選舉唔少建制派「雙料議員」墮馬,例如工黨葉榮擊敗民建聯葛珮帆,成為一時佳話,建制派陣地非牢不可破,明年區選又再有人「打大佬」,挑戰者包括公民黨第二梯隊冼豪輝(Henry),佢向工聯會麥美娟(Alice)挑機,又話會考慮出戰Alice所屬嘅青衣偉盈選區。
聽聞16年排喺郭家麒名單一齊參選立法會嘅Henry,同年已經自動請纓落戶偉盈,但始終Alice有一定實力,當時黨內都有人建議佢去其他區,但公民黨最終力撐Henry,指偉盈係傳統中產區,高學歷人士同後生仔都多,適合中產路線嘅公民黨,加上公民黨仲有另一位地區發展主任譚家浚落戶隔籬嘅安灝區,相信兩區夾住做,可以產生協同效應,二人近日仲成功爭取九巴開辦節日青衣深宵線N243。
八方了解過因乜解究Henry「自尋短見」,佢話自己係偉盈區街坊,而且Alice上屆區會其實係自動當選,唔少街坊不滿冇得揀,所以決定企出嚟博一博。同建制派鬥資源一定冇得比,身為90後嘅Henry惟有靠個「鮮」字,唔係小鮮肉個鮮,係新鮮感個鮮,佢話對家今時今日仲係搞緊量血壓、派嘢,佢就搞搞新意思,每月一次社區共享,成班居民一齊交換圖書、玩具,最重要係提高居民嘅社區參與。
有該區建制派話Henry嘅勤力程度絕對唔可以睇小,「最起碼一星期固定兩次早站」,但Alice自93年開始擔任葵青區議員,04年已經係偉盈區議員,可謂老樹盤根,咪以為易打,但該人都相信Henry打大佬,就算輸咗都贏返知名度,「除笨有精」。呢個世界有競爭就迫住要進步,有工聯會中人就話會加強該區地區工作,但唔擔心Alice受挑戰,有危自有機,反而有助谷返啲鐵票,提早為Alice 2020年爭連任宣傳添。
empty
Henry話對家今時今日仲係搞緊量血壓、派嘢,佢就搞搞新意思,每月一次社區共享,成班居民一齊交換圖書、玩具。
empty
有同區建制派話Henry嘅勤力程度絕對唔可以睇小,「最起碼一星期固定兩次早站」。