新年有個好開始，先祝戰友紅運當頭，百戰百勝！港股紅盤抽上28500關，一來炒15號中美埋枱簽字，二來阿爺年初就急急降準，有機過年前再添食，配合LPR利率下降，為今年全力放水救經濟奠下基礎。近月魏力多番重申，股市升跌全繫資金及信心。如今水已放，信心亦因「有刁」而提升不少，是一個炒股的理想環境，暫時宜以大漲小回格局視之。

短線部署方面，今日起計到1月15日，共有9個交易日，唔少戰友都問：係咪一簽就見光死？股市總係捉心理，當大部份人都估同一邊，好自然就開對家。目前重熊區介乎26000至26999，與現價非常接近，魏力大膽預計，調整可能下周初就出現，之後接近簽字前兩三日再炒過，因此如周五高開再衝，宜先行食糊減磅，候10天線(目前28045)再買番。

個股方面，上文推介的鷹普精密(1286)，3日就到價，值得留意係周四成交急升至900萬元，創逾3個月新高，亦見有大買盤頂上，屬利好訊號，下個阻力為3.6元。中美簽紙前仍有炒作空間，如低位有貨可分段食糊。

另外，市傳港交所(388)正與網易、攜程洽商來港掛牌，消息刺激港交所大漲3%，可成短線催化劑。翻查資料，合資格來港第二上市的中概股包括：京東、拼多多、微博、網易及攜程，合共市值達1.3萬億元，如陸續傾掂赴港，絕非小數目，戰友可趁下周市況調整時低吸。