【新增回應】
韓國天團BIGBANG嘅G-DRAGON（GD）今年2月入伍，早前有報道指GD因右腳踝疼痛，入咗首爾嘅醫院接受右腳腳踝手術，日前更有疑似帶傷返軍隊嘅照片流出。

不過今日GD就被《Dispatch》爆料指佢當兵期間享特權入住特別病房。根據報道指，GD於上周二因為腳踝關節痛到國軍楊州醫院接受治療，並需要留院，當中被允計放10日9夜嘅病假，預計大後日可出院。

而GD喺醫院內獲安排單獨入住連中校、少校都無法入住嘅上校室，據了解平日一般士兵留醫，只可以入住4、6、8人病房，上校室就比高級軍人享用，當中病房有冷氣、雪櫃、電視機等，就連探病時間亦唔同。

另外，GD同時被爆自今年2月27號入伍後，先後入院超過四次，前後喺醫院留咗大約20日，放過兩次病假10日9夜嘅病假。

今日下午，軍隊方面否認GD享特權住上校病房，一名軍官表示：「楊州醫院冇上校病房，目前GD入住單人房。」又指當軍人於特殊情況下，都會被分配到單人房，例如鼻鼾非常嚴重嘅士兵。軍官又澄清，其他病房都有冷氣、雪櫃、電視機等，又強調唔會因為士兵係出名嘅藝人就向對方給予特權。

隨後GD所屬嘅YG事務所亦否認GD享特權，表示該醫院冇上校病房，GD係按照正常程序及標準住院，透露GD所住嘅只係一間小型嘅普通單人病房。

今日網上就流出疑似GD嘅病歷，當中病歷上仲詳細列明GD身上嘅紋身。

精選韓流，喺晒《娛果》
http://fb.com/appledailyent