潘頓上次夜馬用粗口鬧禮儀小姐俾馬會罰十萬蚊，當晚事發情況有廣泛報道，或者禮儀小姐英文麻麻，令潘頓覺得佢冇禮貌，但係潘頓作為公眾人物，又使唔使唔睇場合，即時用粗口去鬧個執行職責嘅女仔？唔少馬迷講得啱，潘頓做人做到咁冇品，騎功更好都冇用。

潘頓被罰，主要係因為賽事執行部總監黎達理喺沙圈目睹成件事，主動走去同競賽小組投訴。今次真係要讚吓黎達理，唔係事不關己就當睇唔到，反而路見不平幫下面嘅工作人員出聲，咪等啲人以為騎練大晒。不過，若然唔係膊頭有花嘅黎達理投訴，真係唔知競賽小組會唔會受理。

其實唔少騎練私下都非常唔好老脾，用粗口鬧人更加閒過立秋，好多賽馬記者同攝記喺晨操都有過被騎練問候嘅經驗，亦有女記者被練馬師粗口問候。柏寶好幾年前喺晨操用粗口鬧記者，結果被競賽小組召見。

賽馬記者搵騎練都係為咗採訪，騎練唔想大可以唔受訪，唔需要口出惡言，若有賽馬記者日後再遇到被騎練粗口問候等不禮貌待遇，應該有樣學樣向馬會投訴，馬會亦應該好似今次罰潘頓咁認真跟進。

當然，唔係個個冠軍級騎師都係不可一世嘅態度，韋達同莫雷拉就一向非常識做人，永遠冇話態度擺款令人難堪。騎師受公眾歡迎，唔係淨係計騎功，個人品格同修養直接影響公眾觀感。

阿Joe