【新增動新聞】
基斯坦奴朗拿度（C朗）盛傳離開皇家馬德里風波越演越烈，但洲際國家盃殺到埋身，C朗身為葡萄牙必然主力，周日就要領軍火併墨西哥，當然唔可以鬆懈。葡軍周五喺俄羅斯喀山進行抵埗後第二課操練，C朗當然成為傳媒追訪焦點，但佢表現集中之餘亦面帶笑容，似乎未有特別受轉會傳聞影響；隊友米基爾施華喺記招亦表示：「C朗以百分百集中度同推動力迎接呢項賽事，就我所見，佢目前只係關注操練，以及對墨西哥嘅小組首戰。」

不過，西班牙《馬卡報》就聲稱C朗已經同葡萄牙隊友透露離開皇馬嘅決定：「我將會離開皇馬。我已經作出決定，唔會返轉頭。」C朗喺個人ig上載練波相時，亦只係簡單配上國旗，追隨者就紛紛留言，希望呢位32歲球星回心轉意。