貼手機保護貼，相信大家都係假手於人，買貼外順便買埋黐貼服務，無計，貪人哋有齊抹布、膠紙工具，小心翼翼幫你貼到靚一靚。本地薑品牌Decomilk近期推出3M專利物料GraphicFilm製作嘅保護貼，貼完可以再貼，且完全不留痕迹，保證你貼到啱為止，就算自己動手都無甩拖。細心睇睇，保護貼下暗藏微細坑紋，呢個設計有助推走氣泡，小記親手試過，無論氣泡幾大幾多，依然一推即搞掂！
不過，搞保護貼九成都係貪靚、與眾不同，出色Design始終係最重要。喺Decomilk五十幾款設計中，最搞鬼又最吸眼球嘅，相信就係佢嘅FakePrint系列。題材廣泛，有跟牛仔褲融為一體嘅褲袋設計、清新兼顏色勁Sharp嘅粟米、睇見都甜到漏嘅朱古力圖案等，設計簡單卻以假亂真！仲可以上網單撈埋主題Wallpaper，跟保護貼嚟個絕配，咁就前前後後都Fake到人喇！

除咗玩嘢嘅FakePrint，Decomilk其他設計同樣賞心悅目，當中最受女仔歡迎嘅一定係配有Swarovski水晶嘅「BlingBling」系列。簡約可愛的圖案設計，配合幾粒閃爆靚水晶，突出得嚟，又唔似鋪滿機殼嗰啲咁浮誇，絕對有品味兼有氣質。另外，女仔要可愛，可以揀蘑菇、Cutie版公仔；男仔要型又可以揀骷髏頭、Vintage風等，總有一款啱你Feel。如果非要獨當一面不可，亦可自行設計，或提供相片俾Decomilk客製化打造，包保獨一無二！
市面上iPhone保護貼有如恒河沙數，但GSII、Note等就相對較少，而Decomilk大部份設計都有齊iPhone、GalaxySII同Note型號，就連近來Sony至潮型機XperiaS亦即將推出對應產品，機友們唔使再投訴只得iPhone可以「換膚」喇！

A.Decomilk（36895311）　
B.ECT（31880767）