逃犯條例修訂名義暫緩、實際撤回，有種講法，話同台灣民進黨蔡英文民調突然一度領先不無關係，雖然轉頭新民調蔡英文再度落後韓國瑜，但確令中共抹一把汗。

與此同時，習近平特朗普又確定G20峯會上見面，港股前後4日反彈逾1,300點，當中玄機似乎同民意都有關。話說，喺美國所有登記選民中，民主黨拜登以49%支持度領先特朗普嘅39%，桑德斯（Bernie Sanders）亦以49%支持度領先特朗普嘅40%。民調結果後，特朗普就出咗句"very good telephone conversation with President Xi"。民意，就係咁樣拯救咗香港。

當民意唔buy特朗普，而特朗普視對中國減少一點強硬為拉票招數，往後日子中國自然有大把唞氣位，至少3,000億美元中國進口貨要徵關稅？國內反彈係過去幾輪之中最強烈，睇怕加稅有難度。香港上市嘅中國概念周期股因此大幅反彈，賭股、航空股、汽車股，估計反彈唔係幾日嘅事。

美國減息如箭在弦，息口敏感股裡面，信義能源（3868）業務係向信義光能（968）收購建設完成嘅太陽能發電站，然後賺電費，收取嘅係每個項目嘅固定收入。根據政策，3868嘅太陽能項目併網後原則上20年內的發電量可按同一適用比率收取上網電價，能見度高。以年度分供分派收入計，股息率4.3厘左右，嚟緊將集資所得再做40億收購，預測股息率隨時5厘以上，相信仲有上升空間。

周期股反彈斷估只係先後次序問題，金風科技（2208）、東岳（189）處於橫行狀態，遲早向上突破，亦可考慮。

晉佳

https://www.facebook.com/advanceguy1