個個都想搞創投，唔通個個都搞到創投咩？現任港區人大代表梁劉柔芬嘅囡囡梁頴宇（Nisa），又真係搞到喎！Nisa近日同啟明創投同事甘劍平獲得AVCJ 2017嘅Venture Capital Professional of the Year，呢個獎幾猛料㗎，過去兩年都由曾經投資眾多知名科技企業如蘋果、Google同WhatsApp等嘅紅杉資本（Sequoia Capital）獲得。

Nisa對獲獎都好意外，感謝啟明團隊同企業創始人兼佢哋嘅teammate。Nisa話創投生涯中，最感動係投資再鼎醫藥，並喺3年內喺美國納斯達克成功上市，好多銀行家同投資者都對此大跌眼鏡。至於啟明呢，今年大豐收，據知短短10個月內就有7家公司上市，未來仲會繼續投資高科技、互聯網、生物科技等項目。

吖，唔知呢次獲獎，有冇為盛傳想選人大嘅Nisa注入強心針，唔理係咪喺西環推薦名單，姑且一戰呢？