恒指又跌89點，藍籌冇乜養眼嘢。滙豐認沽輪1739收59仙，升5.4%，算係稍為突出嘅藍籌輪。滙豐（005）企定，隻認沽輪上升，代表人心都係淡淡哋。
中移動（941）跌勢轉緩，收24.20元，只係唔見10仙，但隻認購輪1715則散18%。冇法子，距夠鐘期愈嚟愈近，幾十巴仙溢價，有乜可能撐落去？有貨在手嘅，快快趣趣散水，走為上着。
和黃（013）跌1.75元，帶動和黃認沽輪1769升10%。1769下月底夠鐘，現價1.40元，溢價0.4%，槓桿率5.3倍。講數據，隻輪好吸引。但要有作為，正股須再跌。正股𠵱家個價，下跌水位有限，1769博唔過。
正股若然升番近8字嗰頭，則隻輪可以諗吓。

714高追不宜
文化傳信（343）前日炒消息，急升24%後，昨日波幅收窄到4仙，收49仙，升1格。
公司輪714收21.2仙，冇乜郁，負溢價1.6%，槓桿率2.3倍。因住正股有回吐，714唔值得高追。