時間：98年3月27日

地點：養和醫院

人物：陳曼娜

《經過》有圈中富婆之稱嘅陳曼娜，98年3月因為視網膜脫落，需要入醫院做手術，啲朋友好關心佢，特別係契妹于莉仲送咗個價值3,000蚊嘅生果籃去醫院。但係陳曼娜未有機會享用過名貴生果籃，喺劉少君探訪完，成個名貴果籃竟然不翼而飛，當時有人同記者講話見過劉少君拎住個果籃離開，到底係物有相似，抑或真有其事，認真無從稽考審死官。
陳曼娜住院時有晚劉少君打電話話要去探佢，仲帶咗提子汁、鴨舌、羅漢齋炒河同冷盤牛肉探病，劉少君見到陳曼娜成枱鮮花同生果，於是將啲嘢放晒喺地下，然後同陳曼娜開餐。劉少君走咗，陳曼娜嘅女性友人到訪，佢吩咐友人將生果鮮花搬番原位，點知搵極都搵唔到個名貴果籃。
陳曼娜聽到有人話見到劉少君拎過個果籃，佢話：「我一直問自己，可能認錯人，唔想小題大做。」至於被指係偷生果籃嘅劉少君好嬲咁話：「神經病，黐線，我唔介意，除非係陳曼娜講喇，佢又唔係唔見鑽石鏈。」當然自此之後，佢哋兩個都冇喺公開場合一齊露過面㖭！
本欄逢周一至周六刊出