當年今日
關於我們

【黃色經濟圈】吳日言逆市開分店搞學生優惠:希望佢哋填飽個肚

蘋果日報 2019/12/07 15:45

吳日言林芊妤

雖然香港經濟正步入技術性衰退,但吳日言無懼逆市衝擊,早前投資的飯糰店第三分店今日於旺角開幕,邀得好友林芊妤(Coffee)一家三口到場支持。
吳日言的老公及囡囡Bea亦有到場,她直言因為社會氣氛不穩,飯糰店的開幕活動一度改期:「我哋都試業咗一段時間,原本係11月開張,之前個幾月唔係咁適合慶祝,所以就延期到今日,簡單而隆重咁慶祝,最緊要大家開開心心。」
吳日言透露最近的生意亦受影響,直指生意額是強差人意:「試過一日嘅生意都唔夠畀人工,不過我覺得先苦後甜仲好,大家一齊過呢個艱難時期。」新店置屬於抗爭運動重地的旺角,吳日言透露試過提早拉閘:「我成日都會落嚟,見過有防暴喺商場門口截查市民,自己感覺唔好。啲客都會急急腳去,因為唔知會發生咩事,又試過開咗兩個鐘就要拉閘,想叫啲員工轉去安全地點返工,點知又冇地鐵、又冇巴士,的士又唔過海,最後要老公車佢哋去安全地方。」
吳日言表示鋪頭有學生餐優惠,直言:「喺呢個時候,希望佢哋填飽個肚。」問到會否介意被標籤「黃店」?吳日言說:「個人嚟講,我可以行前啲,可以標籤我係黃啲,但係我唔可以代表鋪頭。其實我哋都有請啲大學生,而家啲學生都走得好前,試過佢哋有私人嘢要做想走先,我哋都冇問題嘅。其實佢哋唔需要大家送啲咩畀佢,佢哋都想用自己勞力賺錢,所以我會請佢哋。」
Coffee笑言要向吳日言偷師學做生意:「都有諗過做網上生意,可能賣瑜伽衫、健康、減肥產品,呢方面我專業啲。」她透露有不少產品洽談中,為了向fans負責,Coffee強調一定要親身試清楚才決定。
她表示最近工作亦受影響,但不會有怨言:「只要諗到身為香港人,大家一齊共渡時艱。少咗工作都有好處,我多咗時間湊仔,佢不知幾開心。」記者提議Coffee多了時間,可以趁機再造人?她興奮謂:「我都好想呀,生多個都係為咗阿仔,想多個人陪佢。佢哋自己玩,我先可以喺home office做下嘢。而家我坐埋電腦度剪片,佢就坐上我大髀,真係乜都做唔到。」
採訪:盧妹
攝影:沈健程
-----------------------------
《2019高級珠寶鑑賞誌》
點擊即睇過百款鑽飾名表
-----------------------------
【匿名港警爆大鑊】
韓國KBS時事節目《時事直擊:香港 被自殺》
一按即睇
empty
吳日言的飯糰店第三分店今日於旺角開幕,邀得好友林芊妤一家三口到場支持。
empty
吳日言透露最近的生意亦受影響,直指生意額是強差人意,但仍搞學生優惠,望學生能飽肚。
empty
吳日言透露:「其實佢哋(學生)唔需要大家送啲咩畀佢,佢哋都想用自己勞力賺錢,所以我會請佢哋。」
empty
Coffee笑言要向吳日言偷師學做生意,透露有不少產品洽談中。